Finlandiya rəsmi olaraq NATO-ya üzv oldu. NATO ölkələrinin XİN rəhbərlərinin alyansın Brüsseldəki mənzil-qərargahında keçirilən görüşündə Finlandiya 31-ci üzv ölkə olaraq NATO-ya daxil oldu.
Türkiyə Finlandiyanın NATO-ya üzv olmasına səs verdikdən sonra ölkə alyansa daxil ola bildi. Bu isə Rusiya üçün təhdidlər törədə bilər. Düşünsək ki, hazırda Türkiyə Rusiya münasibətləri özünün ən yaxşı dövrünü yaşayır, maraqlıdır ki, bu iki ölkə arasında gələcək strateji proseslərə necə təsir göstərəcək?
“Finlandiyanın üzvlüyü Rusiya-Ukrayna müharibəsindən sonra davam edən vəziyyətlərə, əsasən, baş verən üzvlükdür”.
Bu fikirləri Ednews-a açıqlamasında Türkiyənin ehtiyyatda olan generalı Yücel Karauz bildirib.
“Ən qısa vaxtda da tamamlanan üzvlüklərdən biridir. Türkiyə İsveçlə Finlandiya NATO-ya üzvlüyü ilə bağlı protokolu imzalayıb. Finlandiya qaydalara riayət etdiyi üçün Türkiyə onun NATO-ya üzv olunmasını təsdiqlədi. Bu üzvlük Türkiyə və Rusiya arasında olan münasibətlərə elə də təsir etməyəcək. Türkiyə və Rusiya arasındakı siyasi, iqtisadi münasibət çox qüvvətlidir. Findaliyanın NATO-ya üzv olmasından sonra təbii ki, Şimalın Rusiyaya təsirini görəcəyik. ABŞ və NATO ittifaqının Rusiya ilə əlaqələrində gərginlik ola bilər. Lakin bu proseslərTürkiyə münasibətlərinə təsir etməyəcək”.
General bildidirib ki, Ukrayna və Gürcüstanın NATO-ya üzvlüyü Rusiya üçün qırmızı xəttdir.
“Bu çərçivədə Rusiya və Türkiyə münasibətlərinə pis təsir edəcəyini düşünmürəm. Çünki, Türkiyə Rusiya-Ukrayna müharibəsində Qərbin bütün hərəkətlərin baxmayaraq heç bir yanlış addım atmayıb. Fəqət, Rusiya-Ukrayna müharibəsində Rusiyanın haqsız olduğunu da dilə gətirib. Türkiyə Rusiya üçün bəzi fədakarlıqlar edir. Düşünmürəm ki, belə bir işə görə münasibətləri pozulsun”.
Məsələ ilə bağlı Ednews-a danışan rusiyalı hərbi ekspert İqor Korotçenko isə bildirib ki, Türkiyənin Finlandiyanın NATO-ya üzv olmasına səs verməsi Rusiya ilə münasibətlərinə heç bir mənfi təsir göstərməyəcək. O, həmçinin qeyd edib ki, Rusiya Finlandiya üzərindən bütün təhdidlərə layiqincə cavab vermək iqtidarındadır.
“Əgər həqiqətən NATO Finlandiya üzərindən Rusiyaya təhdid etsə, məsələyə baxılıb qiymətləndirildikdən sonra önləyici tədbirlər görüləcək. Rusiya üçün İsveçdən fərqli olaraq Finlandiyanın NATO-ya üzv olması Rusiyanın Şimal Qərb istiqamətində hərbi strateji vəziyyətin daha da gərginləşməsi və təhdidlərin çoxalması deməkdir. Bu, əsasən, Sankt-Peterburq şəhəri üçün xoşagələn vəziyyət deyil. Rusiya bu vəziyyətə bir- neçə yolla reaksiya verə bilər. Ancaq buna ən əsas reaksiya uğurlu hərbi əməliyyatlar ola bilər”.
Ekspertin sözlərinə görə, Rusiya Ukraynada xüsusi hərbi əməliyyatlar keçirir.
“Bəzi tərəflər buna müharibə donu geyindirmək istəyirlər. Düşünürəm ki, Finlandiyanın NATO-ya üzv olması Rusiyanın Ukraynada keçirdiyi xüsusi hərbi əməliyyatlara heç bir təsiri olmayacaq. Bu Rusiyaya əməliyyatların başlandığı ilk gün elan etdiyi hərbi proqramı həyata keçirməyə mane olmayacaq”.
Aysel Şahmar
