"İranda növbəti prezident seçkilərinə qatılmaqla bağlı qəti qərar verməmişəm. Hər şey irəlidədir".

İranın sabiq prezidenti Mahmud Əhmədinejad belə deyib.

AsiaOne bildirir ki, M.Əhmədinejad hazırda böyük siyasətdən bir qədər kənarlaşmış durumdadır. İranın ali idaretmə strukturlarından olan, ölkənin dini lideri ayətulla Əli Xamneyinin başçılıq etdiyi Siyasi Uyğunluq Şurasının üzvü M.Əhmədinejad Tehran universitetlərində geosiyasət, iqtisadiyyat, beynəlxalq münasibətlər və konfliktologiyadan mühazirələr oxuyur.

O, İranda keçiriləcək növbəti prezident seçkilərinə qatılacağı ilə bağlı xəbərləri geniş şərh etmək istəməyib.

Bu arada bəlli olub ki, siyasi elmlər doktoru, professor M.Əhmədinejad BMT-nin baş katibi Antoniu Oliveyra Qutyerrişə açıq məktub ünvanlayıb.

"BMT bundan sonra da ABŞ və onun müttəfiqlərinin qərarlarının reallaşdırılması üçün alət olmamalı, dünyanın birqütblü düzənə yuvarlanmasına müqavimət göstərməli, dünya ölkələrinin maraqlarına və xalqların mənafelərinə xidmət etməlidir. Təqiblər, savaşlar, zorakılıq, aqressiya, ümidsizlik, yoxsulluq - BMT bu problemlərin həllinə çalışmalı, millətlərin və xalqların inkişafına səy göstərməli, dünya birliyinin kollektiv fəaliyyətinə və kollektiv məsuliyyətinə can atmalıdır.

Hazırda BMT-nin fəaliyyəti effektiv deyil. BMT-nin Baş Assambleyası xalqların kollektiv iradəsinin təmsilçisi olmalı, dünyada ədalət prinsiplərinin qorunmasına çalışmalıdır. Lakin əfsuslar olsun ki, ABŞ-ın hegemon rol oynadığı bu təşkilat bütün mühüm məsələlər və problemlərlə bağlı qərarları ilə qətnamələrində birtərəfli mövqe tutur, dekorativ funksiyaların daşıyıcısı olduğunu göstərir. Bu isə təşkilatın məramına, məqsədlərinə və fəlsəfəsinə cavab vermir. BMT imperialistlərin və müstəmləkəçilərin revanşizminə, hegemonist təfəkkür daşıyıcılarının mövqelərinin möhkəmləndirilməsinə qarşı yaradılmışdı. Buna görə də BMT-nin ilkin, əsl funksiyalarının bərpası üçün zəruri işlər görülməlidir", - məktubda deyilir.

Ekspertlər bu məktubu Mahmud Əhmədinejadın böyük siyasətə qayıdışa hazırlaşması ilə bağlı ilk mesaj təki qəbul edirlər.

Xatırladaq ki, oktyabrın 28-də 60 yaşı tamam olmuş Mahmud Əhmədinejad 2005-ci ilin avqustun 3-dən 2013-cü ilin avqustun 3-dək İran İslam Respublikasının prezidenti olub.

Dövlət başçısı postuna seçilməzdən əvvəl o, Ərdəbil vilayətinin qubernatoru, sonra da Tehranın meri idi.