Eurasia Diary dünən BAMF qərargahında Fondun sədri Umud Mirzəyevlə görüşən Fələstin Dövlətinin Azərbaycan Respublikasındakı səfiri cənab Nasir Əbdülkərimdən müsahibə alıb. Müsahibənin mətnini oxuculara təqdim edirik:

- Cənab Səfir, Azərbaycanla Fələstin Dövləti arasındakı əlaqələr barədə qısa məlumat almaq istərdik:

- Suala görə təşəkkür edirəm. Azərbaycanla Fələstin Dövləti arasındakı siyasi əlaqələr barədə deyə bilərəm ki, çox yaxşıdır və bu əlaqələr yüksələn xətlə inkişaf edir. Azərbaycanın və Fələstinin rəsmi şəxsləri arasında əlaqələr davam edir, çoxsaylı görüşlər keçirilir. Azərbaycan Fələstin problemi ilə bağlı çoxsaylı konfranslara ev sahibliyi etmişdir.  Gələcəkdə də  Azərbaycanla Fələstin arasında bu sahədə birgə fəaliyyət davam edəcəkdir. Bu gün konkret olaraq  Azərbaycan,  BMT-nin Fələstin qaçqınlarına yardım üzrə agentliyi olan UNRWA təşkilatına 200 min dollar məbləğində yardım ayırıb.  Azərbaycanın  ayırdığı bu 200 min dollar məbləğində yardım iki xalq və hökümətlər arasındakı əlaqələrin dərinliyini və gücünü nümayiş etdirir.  Bu əlaqələr çox güclüdür və tarixidir. Onların tarixi iki ölkənin rəhbərləri, mərhum prezident Heydər Əliyevlə mərhum prezident Yasər Ərəfat görüşlərindən başlayır. Azərbaycanla Fələstin arasındakı əlaqələri sizin üçün belə xarakterizə edə bilərəm ki, onlar əla  tarixi qardaşlıq əlaqələri olub yüksələn xətlə inkişaf etməkdədirlər.

- Azərbaycanla Fələstinin oxşar problemləri var: milyonlarla qaçqın, nəticəsiz qərar və qətnamələr və xüsusilə, bu problemlərə münasibətdə beynəlxalq səviyyədə biganəlik və ikili standartlar. Bu sahədə dövlətlərimiz öz siyasətini koordinasiya edirlərmi?

- Artıq qeyd etdiyim kimi, Azərbaycanla Fələstin arasında beynəlxalq səviyyələrdə, bütün beynəlxalq təşkilatlarda daimi əlaqələr, işbirliyi mövcuddur. Bu əlaqələr çərçivəsində Azərbaycan beynəlxalq səviyyədə və təşkilatlarda Fələstin problemi ilə bağlı mövqeyini koordinasiya edib Fələstini müdafiə edir. Həmçinin, Fələstin də belə edir. Bu çox önəmli məsələdir. Biz bilirik ki, istər BMT-nin, istərsə də başqa beynəlxalq təşkilatların artıq mürəkkəbi qurumuş və kağız üzərində qalmış qərarları vardır. Bu qərarlarının bəzilərinin ömrü on illərlə ölçülür, amma heç nə baş vermir. Təəssüf ki, bu yaşadığımız dünyanın reallığıdır. Buna görə də biz həmişə səbirli və dözümlü olmalıyıq, öz əsas hədəfimizə doğru inamla getməliyik, heç bir təsirə uymamalıyıq. Çünki bu növ problemlər bir günə və ya gecəyə həll olunmur. Bu problemlərin həlli dözüm və səbr tələb edir, biz səbirli olub mövcud neqativ halların təsirinə qapılmamalıyıq ki, özümüz də neqativ olmayaq.  

- Biz öz balansımızı qorumalı, gözümüzü  çatmalı olduğumuz hədəfimizdən çəkməməliyik. Bu hədəf də, gec-tez, beynəlxalq hüquqa əsalanan  qanun və qərarların tətbiqi deməkdir. 

- Bu ağrılı problemlərimizin həll imkanını və ümumiyyətlə,  Azərbaycanla Fələstin arasındakı əlaqələrin gələcəyini necə görürsünüz?

- Artıq dediyim kimi, Azərbaycanla Fələstin arasındakı əlaqələr güclüdür. Biz bu əlaqələrin müxtəlif sahələrdə, o cümlədən siyasi əməkdaşlıq sahəsində koordinasiya və qarşılıqlı şəkildə razılaşdırılması da daxil olmaqla daha da inkişaf etdirilməsini istərdik. Azərbaycanla Fələstin arasındakı bu əlaqələr  əlavə olaraq, həmçinin iqtisadiyyat, ticarət, təhsil və başqa sahələri də əhatə edə bilər. Çoxlu fələstinli tələbə Azərbaycanda təhsil alır. Biz də Fələstində mövcud şəraiti nəzərə almaqla bilirik ki, Azərbaycan müstəqil və günü-gündən möhkəmlənən bir ölkədir. Amma Fələstinsə, onun həyatının bütün sahələrinə təsir edən işğala məruz qalmış bir ölkədir. Bu da öz növbəsində iqtisadi və ticarət sahələrində əməkdaşlığımız və işbirliyimiz üçün bir çox problemlər yaradır. Lakin istər Fələstin, istərsə də Azərbaycan rəhbərliyində bu əlaqələri daha da gücləndirmək və genişləndirmək əzmi mövcuddur.

Müsahibəni hazırlayanlar: Zakir Qasımov və Həşim Məmmədov