"Cənubi Qafqaz regionunda dayanıqlı sülh və təhlükəsizliyin təmin olunması Qərbin marağında deyil. Aprelin 5-də Brüsseldə keçiriləcək ABŞ-Ermənistan-Avropa İttifaqı müştərək konfransı əslində hərbi paktdır və bu pakt regionda sabitliyə, sülhə qarşı yönəlib. Yəni, Görünən budur ki, Qafqazda ikinci Ukrayna ssenarisinin reallaşdırılması istiqamətində cəhdlər var və məqsəd regionda ikinci cəbhəni açmaqdır".
Bu sözləri Ednews-a açıqlamasında xanım deputat Könül Nurullayeva deyib. Onun sözlərinə görə, bu, Azərbaycana təzyiq və hərbi müdaxilə planının tərkib hissəsidir və bununla Ermənistan revanşa həvəsləndirilir.
"Çünki ABŞ və Avropa Azərbaycanın öz ərazilərini azad etməsi, suverenliyini və ərazi bütövlüyünü bərpa etməsi ilə barışmaq istəmir. Halbuki Azərbaycanla Ermənistan arasında davam edən sülh prosesi rəsmi Bakı tərəfindən irəli sürülüb və biz münaqişədən sonrakı normallaşmanın bütün məsələlərində hər zaman konstruktiv mövqe nümayiş etdirmişik. Amma 44 günlük müharibədən sonra Qərb 3 il ərzində “humanitar fəlakət” bəhanəsi ilə Azərbaycan rəhbərliyinə qarşı təzyiq kampaniyası apardı. Avropalı siyasətçilərin Qarabağa qanunsuz səfərləri təşkil edildi, separatizmə açıq dəstək verildi. Lakin bunların heç biri nəticə vermədi. Azərbaycanın antiterror tədbirləri Qərbin planlarını alt-üst etdi. Bu səbəbdən indi Azərbaycana qarşı hərbi planlar qurulur.
Xanım deputat qeyd etdi ki, Kollektiv Qərb Ermənistanın əli ilə regionda münaqişə ocağı yaratmaq planlarını yeniləməkdədir:
"Belə ki, XX əsrin sonlarında ABŞ və Avropa Ermənistandan istifadə edərək, Azərbaycan torpaqlarının işğalı üçün ona hərtərəfli dəstək vermişdi. Bu gün isə Ermənistan yenə hərbiləşdirilir və dəstəklənir. Azərbaycan isə 30 ilə yaxın silahlı təcavüzün, işğalın və etnik təmizləmənin qurbanı olduğu halda heç zaman Aİ və ABŞ-dan bu formada qeyd-şərtsiz dəstək almayıb. Rəsmi Bakının bəyan etdiyi kimi, bu davranışlar Ermənistandakı revanşist qrupları Azərbaycana qarşı daha radikal mövqe tutmağa sövq etməklə yanaşı, cəmiyyətdə “Qərbin” sülh prosesində Ermənistanın qeyri-konstruktiv mövqeyini dəstəklədiyi illüziyası yaradır".
Əkbər Novruz
