Yaxın Şərqdə baş verən münaqişələrə İsrail-İran konfliktinin də daxil olması regionda və eləcə də dünya bazarında stabilliyin yaxın zamanda əldə edilməyəcəyindən xəbər verir. Qərb dövlətləri İranın İsrail ərazisinə endirdiyi hava zərbəsindən sonra yeni sanksiyalar tətbiq etmək haqqında danışıqlara başlayıb. 

Bəs görəsən Qərb tərəfi İrana sanksiya tətbiq edə bilər? Bu addım hansı iqtisadi böhrana yol aça bilər?

Məsələ ilə bağlı Ednews-a danışam macarıstanlı politoloq Vasa Laszlo bildirib ki, əgər Qərb İrana iqtisadi sanksiya tətbiq etsə, bunun İran iqtisadiyyatına heç bir ciddi təsiri olmayacaq:

“İrana qarşı sanksiyalar tətbiq etmək haqqında Qərbdən bir çox təkliflər var. Buna baxmayaraq, düşünürəm ki, bu addımın çox kiçik bir təsiri ola bilər. Buna görə də, sanksiyaların edilməsi sadəcə simvolik əhəmiyyət daşıya bilər. İran artıq on illərdir ki, sanksiyalara məruz qalır, buna baxmayaraq heç nə dəyişməyib. Əlavə olaraq, İran silahlar və nüvə proqramı hazırlamaq iqtidarındadır. Rusiya üzərində qoyulan sanksiyalar belə təsirsizdir. Hətta Qərb tərəfindən tətbiq edilən bu sanksiyaların bir çoxu Moskva üçün əks-təsir yaradaraq iqtisadi üstünlük yaratdı. Hazırda İran Rusiya və Çin kimi dövlətlərlə iqtisadi əməkdaşlıq edir. Yəni, Qərbin reaksiyası İran üçün o qədər də maraqlı deyil”.

İsrail-İran münaqişəsi dünya neft bazarında qalıcı təsirləri barəsində də danışan ekspert qeyd etdi ki, İranla İsrail arasındakı konflikt mütləq halda, qısa bir müddət üçün neft qiymətlərinin bahalaşmasına səbəb olacaq: 

“Lakin, münaqişə bundan sonra eskalasiya etməsə, dünya bazarı hər hansı bir yolla öz sakitliyini qoruyacaq. Bununla belə, Qırmızı dəniz, Qəzza və İsrail-İran münaqişələri qlobal marketin gələcəyinin qeyri-müəyyənləşməsi baxımından təbii ki, mənfi faktorlardır. Bunu da nəzərdən qaçırmaq olmaz ki, İran dünya neft bazarında sadəcə olaraq limitli bir neft ixracatçısıdır”.

Fərid Axund