Amerika Birləşmiş Ştatları İranın sonuncu hücumuna İsrailin cavab zərbəsinin məhdud olacağını ehtimal edir. Eyni zamanda, cavab zərbəsinin İranın hərbi və kənardakı proksi qüvvələrini əhatə edəcəyini gözləyir. Paralel olaraq İranda bəzi rəsmi şəxslər və ekspertlər İsrail qarşısında məğlubiyyətin cavabı olaraq Azərbaycanı hədəf seçmək çağırışları edirlər.
Mövzu ilə bağlı Finlandiyada yaşayan siyasi fəal, Güney Azərbaycan Milli Dövlətçilik Şurasının sədri Çingiz Göytürk Ednews-a şərh bildirib. Onun sözlərinə görə, İsrail rəsmiləri dəfələrlə vurğulayıblar ki, İrana qarşı hər hansı bir hücum olarsa bu ancaq hərbi və strateji həfələrə yönəlik olar. İsrail da bunu yaxşı bilir ki, bu coğrafiyada yaşayan insanların heç birinin İsraillə hər hansı bir problemi yoxdur:
“İsfahanda ən önəmli hava hərbi qərargahlarından birinin vurulması da bunun açıq göstəricisidir. İsrail illərdi İrana qarşı beynəlxalq koalisiya yaratmaq istəyində olub. Ancaq bu mərhələdə də buna nail ola bilmədi. Qərb bunu bölgədə gərinliyi artırmamaq kimi səbəblərlə izah edir. Bu səbəblərdən dolayı İranın İsrailə hücumundan dərhal sonra Qərbin bütün aparıcı dövlətləri cavab əməliyyatının məhdud və lokal olması yönündə İsrailə tövsiyyələr verməyə, hətta İsrail üzərində təzyiqlər yaratmağa başladı. Əslində bu İsrailin də maraqları çərviçəsindədir. Çünki İsrail İrana qarşı tək başına hər hansı bir genişmiqyaslı bir savaşın içinə daxil olmaq istəmir. Bu mərhələdə İsrailin ən önəmli hədəfi bölgədəki terror qruplaşmalarına İranın dəstəyini bitirməkdən ibarətdir. Buna nail olana qədər İrana qarşı yayındırıcı, məhdud əməliyyatlarını ara-sıra təkrarlıya bilər. İranın qonşu dövlətləri, o cümlədən Azərbaycanı hədəf seçməsinə gəldikdə isə qorxu mühiti yaratmaq məqsədi ilə səsləndirdiyi içi boş təhdiddən başqa bir şey deyildir. İsrailin İrana qarşı genişmiqyaslı savaşa girməməsinin ən önəmli səbəblərindən biri məhz İranla İsrail arasında məsafənin uzunluğu ilə bağlıdır. İranın qonşu dövlətlərdən hər hansı birinə hücumu isə İsraillə İran arasındakı mövcud məsafəni minumuma endirər. İran isə bu gözə ala bilməz”.
Oğuz
