Bu gün Beynəlxalq Mətbuat Mərkəzində 2016-cı ilin aprel döyüşlərində şəhid olan polkovnik-leytenat Raquf Orucova həsr edilən "Ruhun həsrəti" filminin təqdimat mərasimi olub. Filmin ssenarisi və onun səslənməsi şəhidin həyat yoldaşı Sevinc Orucovaya məxsusdur.
Eurasia Diary-nin xəbərinə görə, tədbiri giriş sözü ilə açan Mətbuat Şurasının sədri, Milli Məclisin deputatı və filmin baş məsləhətçisi Əflatun Amaşov bildirib ki, “Bitməyən müharibənin qəhrəmanları” silsiləsindən olan bu film Mətbuat Şurası və "Veysəloğlu" şirkətlər qrupunun birgə layihəsi nəticəsində ərsəyə gəlib. Ə.Amaşov qeyd edib ki, indiyə qədər bu silsilədən Vətən uğrunda canlarını şəhid etmiş qəhrəmanlarımız haqqında 10-a yaxın film çəkilərək nümayiş etdirilib və bundan sonra da bu istiqamətdə işlər davam etdiriləcək. O daha sonra film barədə təəssüratlarını bölüşmək üçün tədbir iştirakçılarına söz verib.
Deputat Gövhər Baxşəliyeva torpaqlar uğrunda şəhid olan qəhrəmanlar haqqında bu cür filmlərin çəkilməsinin vacib olduğunu vurğulayıb. "Raquf Orucovun döyüşçü övladı olması, kəşfiyyat bölməsinə rəhbərlik etdiyi haqda çox eşitmişik, oxumuşuq. Bu film onun fəaliyyətini çox dolğun əks etdirir. "Raqub Orucovun itkisi ağırdır. Biz başımızı dik tutmalıyıq. İnanırıq ki, qəhrəman oğulların sayəsində işğalda olan torpaqlarımız azad ediləcək. Hər birimiz şəhid ailələrinə diqqət və qayğı göstərməliyik, biganə qalmamalıyıq".
"Kaspi" qəzetinin baş redaktoru Sona Vəliyeva bildirib ki, vətən yolunda canından keçən insanlarla bağlı təbliğat aparılması çox önəmlidir. O Raquf Orucovun Ağdamlıların ürəyində xüsusi yer tutduğunu deyib.
Milli Məclisin üzvü Aqil Abbas aprel döyüşlərində hərbçilərin qəhrəmanlıq göstərdiyini vurğulayıb. O, filmdəki gözəl musiqi tərtibatının olduğunu vurğulayaraq filmin çəkilməsində əməyi olan insanlara təşəkkür edib. Aqil Abbas Qarabağ uğrunda döyüşlərdə əsgərlərdən öndə getdiyi üçün şəhid olanlar arasında çox sayda zabitin olduğunu deyib. O, telekanalları bu məsələlərə diqqət göstərmədiyinə görə qınayıb: "Müğənnilərə ayırdığınız zamandan hərbi-vətənpərvərlik mövzularına da ayırın, filmlər çəkin. Kitablar yazılır, onu çox adam oxumur, amma filmlərin auditoriyası daha genişdir".
Mətbuat Şurasının sədr müavini, Beynəlxalq Avrasiya Mətbuat Fondunun (BAMF) prezidenti Umud Mirzəyev qeyd edib ki, bu cür filmlərə baxan zaman insan ölüb-dirilir. "Bizim ölüb-dirilməyimiz lazımdır. Danışan insanlar, göstərilən fraqmentlər tərbiyəvi əhəmiyyət daşıyır". O, Sona Vəliyevaya və Bəxtiyar Qaracaya təşəkkür edib, eləcə də filmdə özünü mərd şəkildə təqdim etdiyi üçün Raquf Orucovun həyat yoldaşının qarşısında baş əydiyini deyib.
Ağdam İcra Hakimiyyəti başçısının müavini Arzu Rəhimova bildirib ki, biz onun şəhid olduğu üçün deyil, zamanından tez şəhid olduğu üçün ağladıq.
Tədbir daha sonra çıxışlarla davam etdirilib.