Bu gün “15 Sentyabr-Beynəlxalq Sahilyanı Təmizlik Günü” münasibəti ilə Avropa İttifaqının Azərbaycandakı nümayəndəliyi Azərbaycanın Ekologiya və Təbii Sərvətlər Nazirliyi, Avropa Yenidənqurma və İnkişaf Bankı və yerli QHT-lərlə birlikdə Bakının Novxanı çimərliyində təmizlik aksiyası keçirib.
Çimərliklərin tullantılardan təmizlənməsi ilə bağlı təşkil edilən tədbirdə Avropa İttifaqının Azərbaycandakı nümayəndə heyətinin rəhbəri Kestutis Yankauskas, Böyük Britaniyanın ölkəmizdəki səfiri xanım Kerol Krofts, digər diplomatik korpusların nümayəndəlikləri, ETSN-nin əməkdaşları, jurnalistlər, vətəndaş cəmiyyəti fəalları və könüllülər də daxil olmaqla 200-dən çox şəxs iştirak edib.
Aİ-nin Azərbaycandakı nümayəndəliyinin rəhbəri Kestutis Yankauskas Eurasia Diary-yə açıqlamasında bildirib ki, aksiyanın keçirilməsində əsas məqsəd ictimaiyyətin diqqətini ətraf mühitin qorunmasına yönəltmək və insanları bu sahədə üzləşdiyi problem barədə məlumatlandırmaqdan ibarətdir.
Böyük Britaniyanın Azərbaycandakı səfiri Kerol Krofts bu cür tədbirlərin keçirilməsinin müsbət amil olduğunu qeyd edib. Onun sözlərinə görə, ətraf mühitə biganəlik, əslində gələcək nəsillərə göstərilən biganəlikdir və hər birimiz dərk etməliyik ki, ətraf mühiti çirkləndirərək, biz övladlarımıza şikəst gələcək ötürmüş oluruq.
ETSN-nin rəsmi saytında qeyd edilən statistikaya əsasən atmosferə atılan çirkləndirici maddələrin sayına görə Azərbaycan MDB dövlətləri arasında 4-cü yeri tutur.
Qeyd edək ki, ətraf mühitin qorunmasına dair siyasətin təkmilləşdirilməsi və bu sahəyə sərmayələrin yatırılması, eləcə də vətəndaşların sağlam yaşaması, ekosistemin gücləndirilməsi və daha dayanıqlı inkişaf istiqamətlərində Avropa İttifaqı Azərbaycanla sıx əməkdaşlıq edir.
Fərid Həsənov