Macarıstan təhsil almaq istəyən azərbaycanlı tələbələrin əsas seçimlərindən biridir. Azərbaycan Respublikası Təhsil Nazirliyi və Macarıstan İnsan Ehtiyatları Nazirliyi 2018-2020-ci illər üçün təqaüd proqramı hazırlayıb. Bu proqramla hər il  təhsil almaq üçün Azərbaycandan Macarıstana 200 tələbə gedir.

Macarıstanda təhsil alan azərbaycanlı tələbə Samir Abbasov fikirlərini Eurasia Diary ilə bölüşüb.

O, Macarıstanla bağlı müsbət təəssüratlarınından danışıb. Abbasov 3 il ərzində Macarıstan cəmiyyətində müşahidələri barədə söz açıb.

Abbasov macar cəmiyyətini bir çox xüsusiyyətlərinə görə tipik Avropa cəmiyyətlərilə müqayisə edib.

"Macarlar bir çox Avropalı xalqlar kimi fərdi keyfiyyətlərilə seçilir. Deyilənə görə, onlar ailənin qayğısına çox da qalmırlar.

Bildiyimiz kimi, Azərbaycanda ailə dəyərləri çox yüksəkdir. Biz böyük ailəni xoşlayırıq və qohumlarla münasibətləri qoruyub saxlayırıq. Samir deyir ki, macarlar bizdən fərqli olaraq, kiçik ailədə yaşamağı üstün tutur.

O, Macarıstanın Azərbaycanla münasibətinə toxunaraq burada özünə qarşı heç bir antipatiya hiss etmədiyini deyib.

"Ümumiyyətlə, macarlar hər hansı bir millətə nifrət bəsləmir. Onların yalnız ərəb və bəzi afrikalı qeyri-qanuni miqrantlara qarşı antipatiyası var".

Abbasov Macarıstanın Azərbaycanı necə tanıdığı barədə danışdı. "Avropanın bir çox şəhərlərində olmuşam və Azərbaycan haqqında məlumatı olmayan çox sayda insan var. Bunun əksinə olaraq, Macarıstanda insanların çoxu Azərbaycan haqqında bilir. Yaşlı insanlar Sovet dövründən bəri bizi tanıyırlar. Bakını tanıyan çox sayda adam var. Onlar bizi zəngin ehtiyatlara malik ölkə, Türkiyənin dostu, Ermənistanın düşməni kimi tanıyırlar. Bildiyimiz kimi, Ramil Səfərovla bağlı hadisə burada baş vermişdi, həmçinin onlar bizi bir sıra yarışlardan da tanıyır.

O, Azərbaycan və Macarıstan arasında kulinariya sahəsində və dillərində bəzi ümumi cəhətlər olduğunu deyir. Məsələn, Azərbaycanca ana, macar dilində isə anyadır, saqqal-Sakkal, ata-apa və s.

"Bəzi macarların fikrincə, bu, Osmanlı imperiyasının buranı fəth etməsi ilə bağlıdır, bəziləri isə onların qədim tarixi köklərə malik olmaları ilə əlaqələndirirlər. Macarların bəziləri özlərini türk hesab edir, lakin onların sayı azdır".

Samir Abbasov macarların ona və Azərbaycana olan münasibətini yüksək qiymətləndirib. Həmçinin, macarların onu necə qarşıladıqları barədə müsbət xatirələrini bölüşüb.

Ülvi Əhmədli