“İçərişəhər” Dövlət Tarix-Memarlıq Qoruğu İdarəsi Kiçik Qala küçəsində Qala divarlarına zərər yetirən tikinti işlərinin aparılması haqqında yayılan məlumatlara aydınlıq gətirib.
İdarədən verilən açıqlamada qeyd olunub ki, ötən ilin sonundan etibarən “İçərişəhər” Dövlət Tarix-Memarlıq Qoruğu İdarəsi tərəfindən Kiçik Qala küçəsində, Qala divarları boyunca uzun illər həmin ərazidə yerləşən və abidələrə heç bir zərər yetirməyən kafe-terrasların genişləndirilməsi layihəsi həyata keçirilir.
Əlavə edilib ki, layihə işləri qətiyyən tikinti mahiyyəti kəsb etməyərək, sadəcə, şüşə və yüngül metal materialdan ibarət birmərtəbəli şüşəli, qapalı və üzərində açıq yaz-yay kafe-terraslarının yaradılmasını nəzərdə tutur.
“Bu üslubda təmir-bərpa işləri Qala divarlarına heç bir zərər vurmamaqla yanaşı, nə İçərişəhərin, nə də Qala divarının dayanıqlığına və görünüşünə xələl gətirir. İstənilən miqyasda konstruksiya işləri həm daxili, həm zahiri baxımdan İçərişəhərin ənənəvi memarlıq üslubuna uyğunlaşdırılır və yalnız İdarə tərəfindən təsdiqləndikdən sonra həyata keçirilir”, - məlumatda qeyd edilib.
“İçərişəhər” Dövlət Tarix-Memarlıq Qoruğu İdarəsi işçisi məsələylə bağlı qeyd edib ki, “Ən gülməlisi - səhər işə piyada gələrkən Kiçik Qala küçəsində sanki nəyisə axtaran üç gənc gördüm - bir bəy, iki xanım. Əllərində cib telefonları, ərazini gəzib nəyisə axtarırdılar. Yaxınlaşdım, kömək təklif etdim. Telefonlarında mənə dünən geniş yayılan sovetlərin vaxtı zamanı dağıdılmış Bürcün 2011-ci ildə İdarə tərəfindən aparılan bərpası vaxtından (və yeni kimi tirajlanan!) şəkili göstərdilər. Dedim, gəlin sizi həmin ünvana aparım. Gətirdim onları həmin bu 8 il öncə restavrasiya edilmiş Bürcün önünə, baxdılar sifətimə, mən də onlara. Soruşdular ki, şəkildəki dağıntı haradadır - “bu axı həmin ərazi deyil, müəllim”. Sübut etdim - ətrafda olan binaları göstərərək. Susa-susa qaldılar, mən isə bu gözəl fəal gənclərlə vidalaşaraq bugünki gözəl havadan həzz alaraq yolumu davam etdim... Hər şey siz düşündüyünüz kimi deyil, əziz feyk-xəbərçilər. Təxribatlarınız keçməyəcək, bilin”.
Bu iki açıqlama təbii ki, yayılan xəbərlərin və şəkillərin doğru olmadığını və əslində qala ətrafındakı bütün təmir işlərinin qayda-qanun əsasında, tariximizi və Bakımızı qoruyaraq həyata keçirildiyini gözlər önünə sərir. Ancaq bəzi suallar bizi, Bakı sakinlərini narahat etməyə bilməz: "Qalamızın qarşısında restoranlar tikmək bu qədərmi gərəklidir? Restoranlar qalamızdan dahamı vacibdir? Bəli, doğurdan da bu retoranların tikintisi zamanı qala divarlarına heç bir ciddi ziyan dəyməyib. Bəs Qalamızın göz oxşayan mənzərəsinin pozulmasına nə deməli? Bakı ona görə dünyanın sayılıb seçilən və turistlər üçün xüsusi maraq kəsb edən şəhərlərdən biridir ki, bu şəhərdə tarix və və müasirlik iç-içədir. Qədim abidələrlə zəngin bir çox Avropa şəhərlərində belə abidələrə toxunmaq belə qadağandır. Düşünürəm ki, biz də Bakımızı və tariximizi toxunulmaz qılmalıyıq.
Nicat İsmaylov