Prezidentin Naxçıvandan verdiyi son bəyanatlar Ermənistan cəmiyyətinə ayıldıcı təsir göstərəcək və regiondakı mövcud şəraiti daha düzgün qiymətləndirməyə imkan yaradacaq.
Bunu Ermənistanın müdafiə və xarici işlər nazirlərinin gözlənilmədən Naxçıvan istiqamətinə səfər etməsi ilə bağlı danışarkən sabiq dövlət müşaviri Qabil Hüseynli deyib. Politoloq bildirib ki, Ermənistanın təşvişə düşməsinə əsas var:
“Paşinyan Qarabağa səfəri əsnasında sülhdən danışmaq əvəzinə təhdidedici bəyanatlar verdi. Azərbaycan siyasi rəhbərliyi tərəfindən buna əvvəlcə Xarici İşlər Nazirliyi səviyyəsində cavab verilsə də, daha sərt mövqe ölkə Prezidentinin Naxçıvana səfəri ilə öz əksini tapdı. Prezidentin orada diqqəti ordunun gücünə yönəltməsi ondan xəbər verir ki, Naxçıvanın 70 kilometrliyində yerləşən İrəvan şəhəri və Ermənistanın istənilən məntəqəsi çox asanlıqla və yüksək dəqiqliklə vurula bilər. Hakimiyyətə yenicə gəlmiş Paşinyan işğalçı fikirlər səsləndirərək erməni xalqını populizmlə coşdurmaq istədiyi halda Azərbaycan sakit formada və reallığı əks etdirən faktlara müraciət edərək İrəvanın cavabını verir və Paşinyanın yerinə yetirilməsi mümkünsüz olan şərtlər irəli sürərək danışıqlar prosesini pozmağa yönəlik, militarist açıqlamalarının yolverilməz olduğunu bildirir”.
Politoloq Ermənistan cəmiyyətinin hələ Paşinyanın populist çıxışlarının təsiri altında olduğunu bildirib:
“Ermənilər undurlar ki, qarşıda onları çox ciddi sınaqlar gözləyir. Bu sınaqlar içərisində xüsusi yeri Dağlıq Qarabağ probleminin həlli tutur. Bunun əsasını isə Paşinyanın eyni yetkin fikirləri deyil, başqa arqumentlər təşkil edəcək. Paşinyan vədlər verəndə Azərbaycanın XİN başçısı Cenevrədə həmsədrlərlə görüşərək gələcək sülh danışıqlarının istiqamətlərini və məzmununu müəyyənləşdirirdi. Bütün bunlar onu göstərir ki, Ermənistanda inqilab adı altında baş vermiş proseslərdə eyforiyaya düşmüş insanlar hələ ki, reallığı fantastik dərəcədə qiymətləndirir və imkanlarını həddindən artıq şişirdirlər. Hesab edirəm ki, Prezidentin Naxçıvandan verdiyi bəyanatlar Ermənistan cəmiyyətinə ayıldıcı təsir göstərəcək və regiondakı mövcud şəraiti daha düzgün qiymətləndirməyə imkan yaradacaq. Üstəlik, Rusiyada və rus KİV-lərində Ermənistanı çox ağır formada təhqir edən yazılar fonunda Azərbaycan prezidentinin son bəyanatları tam hədəfinə çatır və Ermənistan cəmiyyətinin nə qədər ağır vəziyyətdə olduğunu bütün çılpaqlığı ilə ortaya qoyur”.
Qeyd edək ki, Ermənistanın Müdafiə naziri David Tonoyan və Xarici İşlər naziri Zoqrab Mnatsakanyan ölkənin cənub-qərb sərhədinə gediblər və Naxçıvan istiqamətində olan postlarda olublar.(axar)
