Slovakiyanın məşhur “Dennik-N” qəzeti  Azərbaycana Slovakiyadan silah daşınması ilə bağlı məqalə dərc edib. Məqalədə bildirilir ki, Slovakiya hökuməti öz ərazisindən silah  ixracına lisenziya verib. 

İşğalçılar "DANA" özüyeriyən artilleriya qurğusunun Azərbaycanda olmasından bərk narahatdırlar və bu silahın ordumuzun 100 illiyi ilə bağlı paradda da nümayiş etdirilməsi onların narahatçılığını bir qədər də artırıb. Belə ki, mənfur qonşumuzun Slovakiyadakı səfiri Tiqran Seyranyan ölkəsinin narahatçılığını rəsmi Bratslavaya çatdırıb. O, bu silahların Ermənistan və Qarabağda fəaliyyət göstərən qondarma rejim üçün təhdid olduğunu vurğulayıb.

“Bu tip silahlar real olaraq təhlükəlidir. Onların ixracı Ermənistan və “Dağlıq Qarabağ Respublikası” (beynəlxalq tanınmamış- red.) üçün ciddi problemdir”, - deyə səfir bildirib.

Qeyd edək ki, sözügedən silahı “Czechoslovak Group” (https://czechoslovakgroup.cz/) şirkəti istehsal edir. Bu holdinqdə Çex və Slovakiyaya məxsus bir qrup mülki və müdafiə sənayelərindən ibarət kommersiya şirkətləri birləşib. Şirkət 2014-2016-cı illərdə “EXCALIBUR GROUP” adı altında fəaliyyət göstərib. Holdinqin rəhbəri iş adamı Yaroslav Strnaddır. O, həmçinin “Rene Mater” və “Tatra” avtomobil şirkətinin də sahibidir. Ümumilikdə isə holdinqə 22 şirkət daxildir.

Slovakiya Maliyyə Nazirliyi “Czechoslovak Group”a “DANA” qaubitsalarının çadırılmasına və RM-70 raket yaylım atəşi qurğularının quraşdırılmasına lisenziya verib.

Çex jurnalistlər iddia edirlər ki, raket qurğuları və qaubitsalar Azərbaycana İsrail vasitəsi ilə çatıb.

Xatırladaq ki, Çexiya istehsalı olan "DANA" özüyeriyən artilleriya qurğusu Azərbaycana ötən il gətirilib və sentyabrın 18-dən müxtəlif qoşun növlərinin iştirakı ilə keçirilən genişmiqyaslı təlimlərə cəlb edilib.

“SpGH DANA” özüyeriyən haubitsaları 8X8 konfiqurasiyalı “Tatra” şassisində yerləşir. Artilleriya kompleksinin maksimum sürəti 80 km/saat, gediş ehtiyatı 600 km, atış uzaqlığı 28 km, heyəti 4-5 nəfərdir.

Hərbi maşının əsas silahı 5580 mm uzunluğunda 152 mm 37 kalibr top, yardımçı silahı 12.7 mm çaplı pulemyotdur. Top -4°-dən +70°-dək bucaq altında hündürlüyə atəş açmaq qabiliyyətinə sahibdir. Atış tempi dəqiqədə yarıavtomat rejimdə 4, əllə doldurulduqda 2 mərmidir.

Qeyd edək ki, silahın Azərbaycan ordusunun istifadəsində olduğunu gördükdəndən sonra işğalçı Ermənistan rəsmi olaraq narahatçılığını göstərməyə başlayıb. Bununla bağlı bir müddət əvvəl Avropa Birliyinə də şikayətlər edib. Səfirin Slovakiya mediasına son açıqlaması da işğalçının çox narahat olduğunu göstərir.(faktxeber.com)