Riyad rəhbərliyi "Qaşıqçı qərargahda baş verən qarşıdurma nəticəsində binada öldü" iddiası müzakirə edilərkən, yüksək vəzifəli Səudiyyə rəsmisi Reuters-ə yeni və fərqli şərh verib.
Eurasia Diary xəbər verir ki, Səudiyyə rəsmisinin iddiasına görə, Səudiyyədən olan 15 nəfərlik qrup İstanbula gələrək Qaşıqçını Səudiyyə Ərəbistanına dönməyə razı salacaqdı.
Plana görə, bu komanda bir müddət Qaşıqçını İstanbulun xaricində təhlükəsiz bir evdə saxlayacaq, amma razı olmasa, onu azad edəcəkdi.
Səudiyyə rəsmilərinin sözlərinə görə, hadisələr əvvəldən tərs gedib və komanda öz səlahiyyətlərini aşaraq zor tətbiq edib.
Konsulun otağına aparılan Qaşıqçı, Səudiyyə Ərəbistanına qayıtmayacağını, bir şəxsin binanın xaricində onu gözlədiyini və 1 saat içərisində getmədiyi təqdirdə Türk səlahiyyətlilərilə əlaqə quracağını söyləyib.
"Məni qaçıracaqsınız?", deyə soruşan Qaşıqçıya "Bəli, sənə dərman verib qaçıracağıq", deyilincə o qışqırmağa başlayıb.
Səudiyyə qrupu təşvişə düşüb. Qaşıqçıya mane olmaq üçün boğazını sıxıb ağzını bağlayıblar. Və Qaşıqçı bu zaman ölüb.
Hadisəni gizləmək istəyən qrup Qaşıqçını xalçaya büküb, onu konsulluğa məxsus maşınla aparıblar və cəsədi məhv etmək üçün "yerli bir işbaza" təslim ediblər.
Qrupdakı məhkəmə eksperti qalıqları təmizləyib.
Qrupda başqa bir adam, Qaşıqçının konsulluqdan çıxdığı görüntüsünü yaratmaq üçün onun paltarlarını geyib, eynəyini taxıb konsulluqdan çıxıb.
