Ermənistan Milli Təhlükəsizlik Xidmətinin direktoru Artur Vanetsyan Gümrü sakini olan qadının öldürülməsində şübhəli bilinən rus hərbçinin erməni tərəfinə verildiyi yoxsa, rus hərbi bazasında saxlanıldığı barədə suala cavab verməkdən yayınıb. 

 

Eurasia Diary erməni KİV-lərinə istinadən xəbər verir ki, jurnalistlər baş prokurorluğun bu məsələyə aydınlıq gətirmədiyini və buna görə də MTX-nin mövqeyini bilmək istədiklərini desələr də, Vanetsyan qeyd edib ki, əgər prokurorluq bu sualı cavablandırmayıbsa, o da cavablandıra bilməz. 

“Qatilin milliyyəti, bu və ya digər peşəyə aidiyyati olmur. Qatil, elə qatil olaraq da qalır. O, istənilən halda müəyyən edilməli və cəzalandırılmalıdır”,- deyə Vanetsyan əlavə edib. 

Onun fikrincə, əgər cinayət Ermənistan ərazisində baş veribsə, o zaman cinayətkar Ermənistan məhkəməsi qarşısında cavab verməlidir. Direktorun fikirləri əvvəlcə müsbət qarşılansa da, o sonradan Rusiya tərəfinin məsuliyyətini yumşaltmağa çalışıb.

“Bu günə qədər adı gizli saxlanılan qatil rus hərbi bazasının təmsilçisidir və bazanın nüfuzuna xələl gətirir. Bundan başqa, əgər 2015-ci ilin faciəli hadisəsindən sonra rus hərbi bazası daxildəki özbaşınalığı aradan qaldırmayıbsa, deməli Rusiya Ermənistana işğalçı gözü ilə baxır. Yaxud Ermənistan qarşısında hesabat verməyə ehtiyac görmür.

2015-ci ildə Permyakov avetisyanlar ailəsinə qarşı qırğın törədərkən də Ermənistan hakimiyyəti vəziyyəti yumşaltmağa çalışırdı. Nəticədə guya formal olaraq Permyakov erməni ədalətinə verilsə də, əslində rus hərbi bazasında saxlanılmaqda davam edirdi. Bu isə araşdırma və istintaqın rus tərəfinin diktəsi üzrə aparılacağına əsas verirdi. Ermənistanda baş verən inqilab əslində heç bir şeyi dəyişməyib. Hətta İrəvana yeni narahatlıq doğuran hallar da daxil olub. İlk növbədə ehtimal olunan qalmaqalın seçki təbliğatına mane olmaması üçün cinayət himayə altında 9 gün gizlədilib. Məqsəd, hakim ittifaqın işinə və təbliğatına mane ola biləcək gündəliyin formalaşdırılmasının qarşısını almaqdan ibarət olub.

İkinci məsələ budur ki, cinayəti törədən hərbi qulluqçunun adı, vəzifəsi, saxlanma yeri naməlum qalır. Ermənistanın səlahiyyətli orqanları bu informasiyaların açıqlanmasını bir-birinin üzərinə atmaqla cəmiyyəti qeyri-müəyyənlik içində, Gümrü sakinləri baxımından eyni zamanda qorxu içində saxlayırlar. Hadisəyə hakimiyyət orqanları açıq siyasi qiymət verməyiblər, əksinə rus tərəfinin məsuliyyətinin yuyulmasına yönəlmiş açıqlamalar verirlər. 

Ən dəhşətlisi isə vətəndaş mövqeyinin nümayiş etdirilməməsidir. Ermənistan hakimiyyəti Moskva ilə onsuzda mövcud münasibətləri daha da kəskinləşdirməməyi qərara alıb. Bu isə ən azı bu sahədə inqilabın siyasi effektini şübhə altına alır. Bu, o deməkdir ki, rus-erməni münasibətlərində keyfiyyətcə heç bir şey dəyişməyib”, - deyə erməni mətbuatı Vanetsyanın timsalında Ermənistan hakimiyyətinin digər nümayəndələrinə cavab verib.