Günnüt əməliyyatı Azərbaycanın 2016-cı il aprel döyüşlərindən bu günə qədər olan ən böyük hərbi əməliyyat idi. Bu əməliyyat nəticəsində 11000 hektara yaxın ərazi azad edildi. Ermənistan tərəfi ilk başda bu xəbəri təkzib etsə də, sonradan faktlar qarşısında qalaraq geri çəkildiklərini qəbul etdi. Lakin bu əməliyyat yalnız Günnüt kəndinin azad edilməsi kimi qiymətləndirilə bilməz. Ermənistan ordusunda yüksək rütbəli şəxslər tez-tez qeyd edirdilər ki, mümkün  müharibədə Ermənistan tərəfi böyük strateji mövqeyə sahib olacaq. Ordumuz Günnüt kəndini azad etməsi ilə bərabər sözü gedən ərazidəki strateji hədəfləri də ələ keçirdi ki, bu da gələcəkdə ola biləcək müharibə ehtimalında ordumuza böyük ölçüdə strateji üstünlük verəcək. Azərbaycanın son illərdəki 2 uğurlu əməliyyatına (Aprel döyüşləri və Günnüt əməliyyatı) fikir verdikdə görərik ki, hər iki əməliyyat strateji mövqelərin ələ keçirilməsi baxımından bir birinə bənzəyir. Bu birbaşa böyük müharibəyə planlanmış addımlardır. Əgər 3 il əvvələ qədər müharibə baş versə idi, Azərbaycan strateji olaraq zəif mövqedə olacaqdı. Lakin 2016-cı il aprel döyüşləri və bu ilin may ayındakı Günnüt əməliyyatı nəticəsində Azərbaycan bu geriliyi də aradan qaldırmış oldu. Artıq Ermənistan mövqeləri Azərbaycan ordusunun nəzarəti altındadır. Bir sözlə Günnüt əməliyyatı da Azərbaycanın gəkəcəkdə başlayacağı böyük müharibədə açar rolu oynayacaq. Bundan sonra Ermənistan tərəfi Dağlıq Qarabağ cəbhəsindən başqa Naxçıvan cəbhəsinə də böyük ölçüdə diqqət ayırmalı olacaq ki, bu da onların ordularının iki cəbhəyə bölünməsinə və orduda müəyyən boşluqlara gətirib çıxara bilər. Bu isə gələcəkdə baş verə biləcək müharibədə Azərbaycanın lehinə işləyəcək.

Bütün bunların fonunda Azərbaycanın arsenalında olan yeni silahları nümayiş elətdirməsi də, düşmən tərəfdə şok effekti yaratdı. Ermənistan tərəfi bu günə qədər arsenalında olan “İsgəndər” raketi ilə öyünür və Azərbaycanı hədəliyirdi (Silahın texniki göstəricilərinə görə). Azərbaycan yeni silahlarını nümayiş etdirdikdən sonra isə fərqli mənzərənin yaranacağı artıq bəllidir. Artıq Azərbaycanın əlində yüksək texniki göstəricilərə malik Belarus istehsalı “Polonez” və ən əsası İsrail istehsalı “LORA” Taktiki-Ballistik raket sistemləri Ermənistanın istənilən nöqtəsini yüksək dəqiqliklə məhv edə bilər. Sonda onu söyləmək lazımdır ki, Ermənistanın hərbi balansı bərpa etmək istəyi hələ uzun müddət istək olaraq qalacaq. Azərbaycanın son 1 ay müddətində gələcəkdə baş verəcək müharibənin taleyinə birbaşa təsir göstərəcək addımlar atması isə, düşməni daha konstruktiv mövqe sərgiləməyə vadar edəcək.

Qərbi Kaspi Universitetinin Tətbiqi Politologiya Mərkəzinin eksperti Qadir Kazımov