Sentyabrın 1-dən yeni nəsil şəxsiyyət vəsiqələrinin verilməsinə başlanacaq. Düşünürəm ki, kifayət qədər əhəmiyyətli bir hadisədir. Çünki yeni şəxsiyyət vəsiqəsində elektron daşıyıcı (çip) da olacaq və bu çipə vətəndaşla bağlı standart məlumatlardan əlavə, onun elektron imzası ilə əlaqəli məlumatlar da daxil ediləcək.

Bunu Azərbaycan İnternet Forumunun rəhbəri Osman Gündüz qeyd edib. O, yeni şəxsiyyət vəsiqələrinin ölkədə elektron xidmətlərdən istifadənin daha da genişləndirilməsi ilə elektron hökumət quruculuğunun güclənməsinə, informasiya cəmiyyətinin formalaşmasının sürətlənməsinə və vətəndaş aktivliyinin artmasına müsbət təsir göstərəcəyini deyib:

“Məlumdur ki, hazırda, ümumiyyətlə, elektron imza sahəsində ölkədə rəqabətli mühit yoxdur. Məhz bu baxımdan da ASAN imzanın operatoru “Best Solution” şirkəti mobil operatorlarla sövdələşmə apararaq, ASAN imzanın aylıq abunə haqlarını bu aydan etibarən əsassız olaraq 150% qaldırıb.

Fikrimcə, vəsiqələrdəki elektron imza bu sahədəki vəziyyətin dəyişməsinə müsbət təsir göstərəcək.

Yeni şəxsiyyət vəsiqələri ilə bağlı Prezidentin 5 il öncə verdiyi fərman var. Həmin Fərmanla təsdiqlənən əsasnaməyə görə, şəxsiyyət vəsiqəsinin verilməsi və məlumatların elektron daşıyıcısına daxil edilməsi, həmin məlumatların dəyişdirilməsi və istifadəsi ilə bağlı yeni qaydalar müəyyən olunub”.

Ekspertin sözlərinə görə, yeni nəsil vəsiqələrin verilməsi prosesində təxminən 9 dövlət qurumu iştirak edəcək:

“Təbii, bu prosesdə hər bir qurumun da öz səlahiyyətləri var. Artıq bütün hazırlıq proseslərinin başa çatdığı bildirilir.

Vəsiqələr DİN-in şəxsiyyət vəsiqəsi verən yerli orqanları və ASAN Xidmət Mərkəzləri tərəfindən veriləcək”.

Osman Gündüz yeni vəsiqələrlə bağlı dövlət rüsumunun müəyyən olunmadığını deyib:

“Güman ki, elə köhnə rüsum qüvvədə qalacaq. Köhnə rüsum on gün müddətində verildikdə və ya dəyişdirildikdə 5, üç iş günü üçün 25, bir iş günü üçün 35 manatdır.

Bu rüsuma vətəndaşın elektron imzası ilə bağlı xərclər daxil olmayacaq.

Qaydalara görə, vəsiqədəki elektron imza ilkin vəziyyətdə aktiv olmayacaq. Bunu vətəndaşlar istəyə bağlı olaraq öz arzusu ilə vəsiqəni alarkən və ya sonradan NRYTN sertifikasiya mərkəzinə müraciət etməklə aktiv edə biləcəklər. Bunun üçün vətəndaşıın ödəməli olduğu vəsait də hələlik açıqlanmayıb. Qaydalara görə, bu rüsumun 25 faizi NRYTN Sertifikat Xidmətləri Mərkəzinin hesabına köçürülür, qalan hissəsi isə dövlət büdcəsinə ödənilir.

Əgər gələcəkdə hansısa ölkələrlə şəxsiyyət vəsiqələrinin qarşılıqlı tanınması olarsa, vətəndaşlar yalnız bu tip ölkələrə şəxsiyyət vəsiqəsi ilə səfər edə biləcəklər”.