Koçaryan formulu - Ermənilərin faciəsinə çevrilən düşüncə | Eurasia Diary - ednews.net

11 Aprel,


Koçaryan formulu - Ermənilərin faciəsinə çevrilən düşüncə

Analitika A- A A+
Ermənistanın keçmiş prezidenti, "Qarabağ klanının" lideri, qatil Robert Koçaryan Rusiya KİV nümayəndələri üçün keçirdiyi mətbuat konfransında deyib ki, Qarabağda ədalətsiz sülh yeni müharibəyə gətirib çıxaracaq. 
 
"Koçaryan “maraqlı” misal çəkib: “İkinci Dünya Müharibəsi də ədalətsiz Versal sülhünün nəticəsi idi”. Koçaryan fikrini belə davam edib ki, “əgər tərəflərdən hansısa biri müharibənin nəticəsi ilə razılaşmırsa, deməli yeni müharibəni gözləməlisən. Bu, əlverişli geopolitik şərtlər yarananda baş verəcək: “Azərbaycanda düşünürlərsə ki, Qarabağ problemini həll ediblər, bu, əslində əks məna kəsb edir. Baxmayaraq ki, üstün mövqedədirlər”. Koçaryanın bu açıqlaması nə deməkdir?
 
Birincisi, Ermənistanın müharibədə məğlubiyyəti Robert Koçaryanın "keçmiş şanlı tarixi" üzərindən yekə bir xətt çəkib və o bunu həzm edə bilmir. Koçaryan gəncliyindən 2020-ci ilin sentyabrın 27-ə qədər nəyin uğrunda mübarizə aparmışdısa, Azərbaycan ordusu erməni qatilinin bütün bu "mübarizəsini" sıfırladı. Koçaryan digər qatillərlə birgə Şuşanı, Laçını, Kəlbəcəri və Dağlıq Qarabağ ətrafındakı digər rayonlarımızı ona görə işğal etmişdi ki, "təhlükəsizlik zolağı" yaratsın və Dağlıq Qarabağın "müstəqilliyinə" nail olsun. "Təhlüksəzilik zolağının" ömrü 26 il sürdü və ortadan qaldırıldı, "müstəqllik" xülyası da puç oldu. Yəni Koçəryan nəyin uğrunda mübarizə aparmışdısa, savaşmışdısa, qətliamlar törətmişdisə - hamısı nəinki ermənilər üçün nəticəsiz qaldı, ermənilərin faciəsinə çevrildi. Ona görə də Koçaryan erməniləri yenidən "mübarizəyə" səsləməyə çalışır. Aydındır ki, Kaçaryandan "mən gərək belə etməzdim, səhv etmişəm" açıqlamasını eşitməyəcəkdik.
 
İkincisi, Robert Koçaryanın 10 noyabr bəyanatını Versal sülh müqaviləsi ilə müqayisəsi uğursuzdur. Bəli, Almaniya Birinci Dünya müharibəsinin nəticəsinə görə Versal sülh müqaviləsini imzalamağa məcbur idi və bu Almaniyada revanşist əhval-ruhiyyənin artması, faşistlərin hakimiyyətə gəlməsi – İkinci Dünya Müharibəsinin başlaması ilə nəticələndi. Koçaryanın müqayisəsi ona görə başdan ayağa qüsurludur ki, Ermənistan Almaniya deyil, qonşu ölkənin əhalisi azalır, Azərbaycanın və Türkiyənin əhalisi isə artır. Ermənistan hansı insani və texniki potensialı ilə bizdən “intiqam” almağa çalışacaq? Koçaryanın Versalla bağlı paralellər aparması həm də o deməkdir ki, Ermənistanda da keçmişdə Almaniyada olduğu kimi faşistlər hakimiyyətə gəlib Azərbaycana qarşı müharibəyə başlayacaq, qətliamlar törədəcək. Yenə də eyni sual gündəmə gəlir: Koçaryan Ermənistanda hakimiyyəti zəbt etsə belə hansı güclə Azərbaycana qarşı savaşacaq? İndi 1990-cı illər deyil, Azərbaycan da tək deyil, Türkiyə ilə hərbi ittifaq qurulub. Biz azad etdiyimiz ərazilərimizi göz bəbəyimiz kimi qoruyacağıq, Türkiyə də torpaqların yenidən işğalına imkan verməyəcək.
 
Buna baxmayaraq, Ermənistanda indi və gələcəkdə Robert Koçaryan kimilərin var olduğunu və var olacağını nəzərə alaraq Azərbaycan öz ordusunu daima gücləndirməli, modern hərbi texnika alınmalı və Türkiyə ilə hərbi ittifaqı daha da gücləndirilməlidir. Yəni əlimiz hər zaman tətikdə olmalıdır!"

 

Mətndə səhv varsa, onu qeyd edib Ctrl+Enter düyməsini basaraq bizə göndərin.

EurasiaDiary © Xəbərlərdən istifadə zamanı hiperlinklə istinad olunmalıdır.

Bizi izləyin:
Twitter: @EurasiaAz
Facebook: EurasiaDiaryAzerbaycan
Telegram: @eurasia_diary


Загрузка...