Türkiyə Ədliyyə Nazirliyi Türkiyədə çevriliş cəhdinə əmr verməkdə və təşkil etməkdə günahlandırılan Fətullah Gülənin ABŞ-dan müvəqqəti həbs olunmasını tələb edib. ABŞ-ın buna necə reaksiya verəcəyi isə məlum deyil.
“Eurasia Diary” ABŞ-ın F.Gülənlə bağlı hansı mövqeyi tutacağı, Türkiyənin tələbinə necə cavablandıracağı ilə bağlı Anadolu Agentliyinin İstanbul üzrə direktoru Hüseyn Altınalandan müsahibə alıb. Hüseyn Altınalanın bununla bağlı şərhləri isə belədir:
ABŞ-ın Türkiyənin tələbinə müsbət və ya mənfi cavab verməsi onun gələcəkdə FETÖ rəhbərliyi ilə bağlı planlarından asılı olacaq. FETÖ liderinin geri verilib və ya verilməməsini indidən təxmin etmək çox çətindir. Digər tərəfdən ABŞ Güləni ekstradisiya etməmək üçün israr edir, ancaq müqavimət göstərməyə davam edib-etməyəcəyi, hələ ki, naməlumdur. Bu onların maraqlarıyla bağlıdır, əgər maraqlarına cavab verməsə, ekstradisiya etməyə bilər...
ABŞ ümumiyyətlə, öz mənfəətlərinə görə istifadə etdikləri adamları məqsədinə çatdıqdan sonra buraxır. Buna görə də, amerikalılar yeni planlarına əsasən, Güləni geri qaytaracaqlarsa da, yenə öz xeyirlərini düşünüb ekstradisya edə bilərlər. Hal-hazırda ABŞ terror təşkilatı rəhbərinə dəstək verən ölkə mövqeyindədir.
ABŞ rəhbərliyi birbaşa Türkiyə Respublikasının ölkə başçısını öldürməyə cəhd edən və bu planı tətbiq edən, xalqını və məclisini bombalayan, polislərə, mülki vətəndaşlara və qeyri-qanuni əmrə itaət etməyən əsgərlərə güllə yağdıran terror təşkilatının rəhbərini müdafiə etməyə davam edir.
Eyni zamanda ABŞ, PKK-nın sağ əli olan PYD-yə açıq şəkildə dəstək verməklə müttəfiq ölkəyə qəti şəkildə yaraşmayan siyasət həyata keçirir. ABŞ-ın bu mövqeyinin fərqində olan Türkiyə isə özünə başqa müttəfiqlər axtarır və bu vəziyyət ABŞ-a çox böyük bir zərbə vuracaq.
Eurasia Diary, Əli Mirhəşimli
Tərcümə: Vüsalə Əlövsətqızı