“Ailədə üç uşaq olmuşuq, atam 2011-ci ildə xərçəng xəstəliyindən dünyasını dəyişdi. Bizi anam böyüdüb. Əmrah səkkizinci sinifi bitirib. Cəmşid Naxçıvanski adına Hərbi Liseyə sənəd verdi, amma imtahandan kəsildi. O bir il hazırlaşıb yenidən liseyə imtahan verdi və qəbul oldu. Mən isə Ali Hərbi Məktəbə qəbul olundum. Əmrah liseyi bitirib akademiyaya gəldi və onda mən artıq 4-cü kursdaydım”.
EDNews.net xəbər verir ki, bunu Moderator.az-a açıqlamasında Vətən müharibəsində şəhid olan xüsusi təyinatlı leytenant Əmrah Əkbərovun qardaşı, baş-leytenant Orxan Əkbərov deyib. O, şəhid qardaşının döyüş yolunu belə nəql edib:
“Akademiyanı bitirdikdən sonra xüsusi təyinatlıların kursuna yollandım və kursu bitirdikdən sonra xidmətə başladım. Əmrah da xüsusi təyinatlıların kursunu keçdi və artıq iki ay idi ki, leytenant kimi xidmətə başlamışdı. 27 sentyabrda müharibə başlayanda isə iki qardaş döyüşə yollandıq”.
“Amma Əmrah anamgillə sağollaşıb, müharibəyə getdiyini demişdi...”
“Mən yaş və rütbəcə Əmrahdan böyük olsam da, hərb sənətini seçməyimə o, səbəb olub. Əmraha baxıb həvəslənmişəm. Qohumlardan kimsə əsgərlikdən gələndə mən, sadəcə, görüşüb qayıdırdım. Amma Əmrah onların formasını alıb geyinirdi, hərbiylə maraqlanırdı. 2016-cı ilin Şanlı aprel döyüşləri də bizi həvəsləndirdi.
Biz Vətən müharibəsində iştirak edəndə isə Əmrahla bir dəfə əlaqə saxlamışam. Mən evdən çıxanda döyüşə getdiyimi demədim. Amma Əmrah anamgillə sağollaşıb, müharibəyə getdiyini demişdi. Döyüş vaxtı bir dəfə zəng vurub evdən soruşdum ki, Əmrah zəng vurur? Dedilər ki, zəng vurur, amma mən səhv başa düşdüm və elə bildim ki, zəng vurmur. Sonra özünə zəng vurub danışdım və dedi ki, hər gün evlə əlaqə saxlayıram”.
“Dedim ki, yalan deməyin, hər gün yanımda dostlarım şəhid olur...”
“Oktyabrın 12-də evə zəng vurub danışdım və beş dəqiqə sonra isə Əmrahın şəhid xəbərini bizə veriblər. Anamgil də elə bilib ki, bunu mən bilmişəm. Əslində isə Əmrahın şəhid olmasından xəbərsiz idim. Əmrah dəfn olunan günün səhəri günü evə zəng vuranda gördüm ki, nəsə birtəhərdilər. Dedim ki, nə olub? Dedilər ki, Əmrah yaralanıb, kəndə gətirirlər. Dedim ki, yalan deməyin, hər gün yanımda dostlarım şəhid olur. Nə olubsa, düzünü deyin. Onda artıq mənə açıq dedilər ki, Əmrah şəhid olub. Məni müharibədən 10 günlük evə buraxdılar və Əmrahın üç mərasiminin axşamına gəlib çıxdım”.
“Əmrah gücünü toplayıb ermənilər yerləşən səngərə tərəf qaçıb və...”
“Məlum oldu ki, Əmrahgilin qrupu düşmənin 3 döyüş texnikasına pusqu qurub, maşını və içindəkiləri məhv ediblər. Yerdə qalan düşmən əsgərləri isə qaçıb mövqe tutublar. Orda yenidən atışma başlayıb. Əmrah üç yoldaşından ikisinin şəhid, birinin isə yaralı olduğunu görür. O, sağ qalıb, ya qalmayıb, bilmirəm. Əmrah gücünü toplayıb ermənilər yerləşən səngərə tərəf qaçıb. Səngərə çatanda sonuncu qumbaranı açaraq özünü partladıb. Şəhid olarkən 10 erməni əsgərini də məhv edib”.
Qeyd edək ki, Əmrah Şahid oğlu Əkbərov 21 fevral 1998-ci ildə Lerik rayonunun Livədirqə kəndində anadan olub. 2004-cü ildə Livədirqə kənd orta məktəbinin 1-ci sinfinə gedib. 2005-ci ildə təhsilini Xəzər rayonunda yerləşən 322 saylı tam orta məktəbində davam etdirib. Orta məktəbi bitirdikdən sonra Cəmşid Naxçıvanski adına Hərbi Liseydə və Ali Hərbi Məktəbdə təhsil alıb.
Vətən müharibəsində göstərdiyi qəhrəmanlıqlara görə ölümündən sonra ölkə başçısı tərəfindən “Vətən uğrunda”, “Cəbrayılın azad olunmasına görə”, “Xocavəndin azad olunmasına görə”, “Hərbi xidmətlərə görə” medalları və “Azərbaycan Bayrağı” ordeniylə təltif edilib.
Allah cəmi şəhidlərimizə rəhmət eləsin!