Rusiyada qismən səfərbərlik elan edilməsi orada yaşayan və Federasiyanın vətəndaşı olan soydaşlarımızı çıxılmaz vəziyyətə salıb. Qismən səfərbərlik çərçivəsində çağırış yalnız ehtiyatda olan və təcrübəsi olan vətəndaşlara şamil olunacaq.
Qərarla bağlı soydaşlarımızın ölkədən çıxışına da bəzi məhdudiyyətlər qoyulub.
Məsələ ilə bağlı Rusiyada yaşayan həmyerlimiz İlkin Qazıyev Ednews-a bildirib ki, səfərbərlik elan olunan kimi Moskva və digər iri şəhərlərdə əhali qərara etiraz edib.
“Əlbəttə heç kəs öz övladını müharibəyə yollamaq istəmir. Burada heç kəs Ukraynan qarşı savaşmaq üçün könüllü şəkildə cəbhəyə getmək istəmir. Şəxsən mən hələ ki, səfərbərliyə cəlb olunmamışam. Milliyətcə, rus olan dostlarımdan cəbhəyə yollananlar var. Ümumiyyətlə, burada insanlar müharibənin nə məqsədlə aparıldığını anlamır. Elə bu səbəblə əhalinin çoxu müharibəyə qarşıdır”.
Maraqlıdır ki, Səfərbərliyə çağırılacaq yaş kateqoriyaları arasında olan gənclərin Azərbaycana olan köç dalğası gözlənilirmi ?
Politoloq Natiq Miri Ednews-a açıqlamasında bildirib ki, Ukrayna-Rusiya müharibəsi başlayandan sonra bu köç dalğası başlayıb. Təkcə Azərbaycana yox, həmçinin Postsovet, Avropa ölkələri bu sıradadır.
“Bu xüsusda, Azərbaycanda hər hansı sosial yöndə ciddi bir kataklizm müşahidə olunmayıb. Düşünmürəm ki, indiki vəziyyətdə Rusiyadan azərbaycanlıların kütləvi köç etməsi yaşansın. Çünki bu qismən səfərbərlikdir. Bu çağırışda əsasən keçmiş hərbçi və zabitlər nəzərdə tutulur. Bu siyahıya Rusiyada yaşayan azərbaycanlıların kütləvi şəkildə düşməsi gözlənilmir. Hesab edirəm ki, hazırda Rusiyada yaşayan azərbaycanlılar üçün ciddi potensial təhlükə yoxdur”.
Dövlət Miqrasiya xidmətinin ictimai şurasının sədri Azər Allahverənov Ednews-a açıqlamasında bildirib ki, Rusiyada bir neçə gün əvvəl əmək fəaliyyəti ilə məşğul olan əcnəbilərin 1 illik müqavilə bağlayaraq orduda hərbi xidmət keçməklə Rusiya vətəndaşı ola biləcəyi haqqında qanun qüvvəyə minib.
“Bu gün müəyyən yaş və digər meyarlara aid olaraq səfərbərliyə cəlb olunan bir şəxs Rusiya Federasiyasının vətənədaşıdırsa, onlar səfərbərliyə çağırılmalıdır. Təbii ki, burada əsas şərt şəxsin Rusiya vətəndaşı olmasıdır. Onun hansı etnik mənsubiyyətə daxil olmasının fərqi yoxdur. Eyni zamanda Rusiya vətəndaşı olan etnik azərbaycanlılar da bu kateqoriyaya daxildir. Biz səfərbərlikdən yayınmaq istəyən azərbaycanlıların neçə faizinin ölkəyə geri dönəcəyi haqqında dəqiq proqnoz verə bilmirik. Amma böyük ehtimalla Rusiya vətəndaşı olan azərbaycanlılar qanuna riayət edən şəxs kimi onlarla bağlı verilmiş qərarlara uyğun davranacaqlar”.
Azər Allahverənov həmçinin qeyd edib ki, Rusiya Cinayət məcəlləsinə bir neçə maddələr daxil etmək istəyir. Qanunda müxtəlif bəhanələrlə səfərbərlikdən yayınanlara cinayət işinin açılması nəzərdə tutulub.
“Rusiya Müdafiə Nazirliyi səfərbərlik zamanı etnik mənsubiyyət arasında bölgü edəcəkləri barədə heç bir məlumat yoxdur. Bunu proqnazlaşdırmaq çox çətindir. Bizim hədəf qruplarımız ölkə ərazisinə gələn miqrantların miqrasiya qeydiyyat üzrə ictimai nəzarəti həyata keçirməkdir. İki gün ərzində bizə çoxsaylı müraciətlər olunub. Qanuni yollarla ölkəyə gəlmək qaçqın statusu ilə bağlı suallar ünvanlanır . Miqrasiya qanunvericilik imkanlarından ibarət deyə bilərəm ki müəyyən sayda səfərbərliyə düşməyən insanlar var ki, onlar bu gün Azərbaycana gəlmək istəyir. Müraciət edənlər arasında tələbələr, Azərbaycanda vətəndaşlığı almaq istəyənlər də var. Yəni burada təkcə azərbaycanlılardan söhbət getmir. Son 7 ay ərzində Azərbaycana gələnlər arasında Rusiyadan gələn etnik ruslar da olub. Məlum sanksiyalara görə öz bizneslərini Rusiyada dayandırıb Azərbaycana yönləndirən insanlar da var. Xüsusilə də İT sahəsində şirkət quran adamların sayı az deyil. Mən düşünürəım ki hadisələr fonunda Azərbaycana növbəti miqrant axınının gəldiyinin şahidi ola bilərik. Artıq siqnallar daxil olmaqdadır . Rusiya quru yolların açıq olduğu ölkələrə inanların kütləv şəkildə axını müşahidə olunur. Məsələn Rusiya - Gürcüstan sərhədində olan tıxaclarda minlərlə miqrant görmək olar”.
Ayan Rzayeva