Rusiyanın Ukraynaya qarşı müharibəni davam etdirməsi qarşı tərəfi zəiflətmir, əksinə gələcəyə daha ümidlə baxmağa imkan yaradır. ABŞ rəsmiləri də bu fikirdədir. Hətta son günlər Ukraynanın Krımı geri ala biləcəyi barədə fikirlər səsləndirilməkdədir.

Ukraynalı politoloq Vadim Tryuxan son proseslərlə bağlı Ednews-a açıqlama verib. O, xüsusilə ABŞ-ın Krımla bağlı müsbət yanaşmasına belə əsas gətirib: “İlk öncə qeyd etməliyəm ki, müqayisə edərkən Ukrayna ilə Rusiya eyni tərəzidə ölçülə bilməz. Rusiya Ukraynanın suverenliyinə xələl gətirən, dinc əhalimizi qətlə yetirən tərəfdir. Məhz Qərb də bunu görür və bunu qiymətləndirərək Ukraynanın yanında yer alır. ABŞ bizim müttəfiqimiz olaraq bizə hər sahədə dəstək olmağa çalışır. Yeri gəlmişkən, son toplanan rəylərdə 73% Amerika vətəndaşları Ukraynanın silahla təchiz olunmasını dəstəkləyib. Krım məsələsinə gəlincə isə bu ali baş komandanımız president Zelenski, general Valeri Zalujni və digər komandir heyətinin qərarına bağlıdır. Lakin son olaraq deyim ki, bu an məsələsidir və əminəm ki, bu baş tutacaq”.

Ekspert eyni zamanda, Ukrayna ordusu tərəfindən ələ keçirilən İranın kəşfiyyat dronları barədə də söz açıb. O, müharibədən sonra İrandan təzminat ödəməsi barədə tələb irəli sürüləcəyini deyib.

“Ukrayna ordusu demək olar hər gün İran və Rusiyaya aid dronları havada məhv edir, bəzilərini isə ələ keçirir. Son hesablamaya baxılsa bu günədək ümumilikdə 1000-dən çox düşmən tərəfinə aid dron zərərsizləşdirilib. Təkcə dünən 15 dron məhv edildi. İranın bu hərəkətləri yolverilməzdir və Ukrayna hökuməti bu barədə məlumat əldə edərkən İran səfirini dərhal geri göndərdi. Hesab edirəm Ukrayna tezliklə İranla olan diplomatic əlaqələrini kəsəcək. Hətta müharibə bitdikdən sonra İrandan təzminat ödəməsi barədə tələb irəli sürülə bilər. Bu kateqoriyaya həm də Rusiyaya dəstək olan digər tərəfdaş ölkələr də daxildir.”

Politoloq həmçinin, qələbə proqnozu barədə də fikir bildirib.

“Hər şey Ukraynaya tərəfdaş ölkələr tərəfindən verilən silahlardan asılıdır. Hələlik mövcud olan silahlar Putin rejimini tam çökdürəcək qədər güclü olmasa da vəziyyətin hər an dıyişə biləcəyi də gözlənilməz hesab edilir. Müsbət olan budur ki, Ukrayna ordusu hər gün işğal altında olan ərazilərini azad edir. Ən önəmlisi isə Rusiyanın bu günədək 11 generalı daxil olmaqla 60 min əsgərinin Qara dənizdə 15 hərbi gəmisi ilə birlikdə batırılmasıdır. Bu Rusiya üçün böyük itgidir və son 77 il ərzində heç bir ölkə müharibədə bu qədər itgiyə məruz qalmayıb. Hesab edirəm ki, Ukrayna Azərbaycan daxil olmaqla bütün ona dəstək olan tərəfdaş ölkələr sayəsində haqlı qələbəsini əldə edə biləcək”.

Elnur Ənvəroğlu

• Tag:
• Rusiya
• Ukrayna