Bu gün SSRİ xalq artisti, əfsanəvi ifaçı və bəstəkar Müslüm Maqomayevin 75 yaşı tamam olur.
Sərhəd tanımayan sənəti, geniş ürəyi və təkrarsız bariton səsi ilə bir neçə nəsli fəth etmiş xalq artistinin 75 illiyi ərəfəsində Andrey Kotov adlı qeyri-adi ifaçı Eurasia Diary-nin qonağı olub.
Andreyin unikallığı onun dahi sənətkar Müslüm Maqomayevin sənətinə sevgisində, həmçinin səsinin gözəlliyi və ifa tərzindədir.
Andrey Kotov Moskvada yaşayır. O, Qnesinıx adına Rusiya Akademiyasında təhsil alır. Sənətdə ilk addımlarını atan ifaçı Müslüm Maqomayevi şəxsən tanıyıb. Məsələ burasındadır ki, Andreyin anası yelena Katkova 30 il Müslüm Maqomayevlə çalışıb. Bəlkə də elə məhz bu, Andreyin həyatında əsas rol oynayıb.
“Mən uşaq vaxtlarımdan Müslüm Maqomayev sənətinin vurğunu olmuşam. Onun mahnılarını oxumağa çalışırdım, düzdü uşaq səsi ilə. Lakin artıq o vaxtdan xalq artistinin sayəsində məndə musiqiyə sevgi yarandı. Bir dəfə Müslüm Maqomayev Sevastopolda keçirilən vokal müsabiqəsinə gedən qatarda mənim gediş haqqımı ödədi”.
Andreyin sözlərinə görə Müslüm Maqomayev tez-tez ona vokal və səhnə mədəniyyəti ilə bağlı təlimatlar, dəyərli məsləhətlər verirdi.
“Mən Müslüm Maqomayevlə tez-tez görüşürdüm. Hər görüşdə o mənə qiymətli nəsihətlər verirdi. Onun ölümündən sonra mən oxumağı öyrəndim. Ondan yadigar qalan kostyum səhnədə mənə uğur gətirir”.
Bu Andreyin Bakıya ilk səfəri deyil. Demək olar ki, hər il Andrey anası ilə Müslüm Maqomayevin xatirəsini yad etmək üçün Bakıya gəlir və ilk olaraq onun Fəxri Xiyabanda yerləşən məzarını ziyarət edirlər.
“Bakı xoşuma gəlir! Bu şəhərin özünəməxsus energetikası var. Mən orta əsrin dahi şairi Nizami Gəncəvinin yaşadığı Gəncədə olmağı çox istərdim. Eləcə də, Azərbaycan dilini öyrənməyi çox istəyirəm. Repertuarımda bir neçə Azərbaycan mahnısı var. Onların içində Müslüm Maqomayevin “Azərbaycan” mahnısı xüsusi yer tutur.
Andrey deyir ki, onun sənəti insanların xoşuna gəlir. O bir çox musiqi müsabiqələrinin mükafatını qazanıb.
Müslüm Maqomayevin mahnılarını oxuyarkən insanlar məni alqışlayır. Deyirlər ki, bu mahnılar onları keçmişə qaytarır və ən xoş xatirələri yada salır”.
Əminəm ki, onda hər şey alınacaq. Xüsusilə də onda insanların qəlbinə yol tapan iki əsas şey – istedad və mehriban qəlb var.
QEYD: Video reportajda Andrey Müslüm Maqomayev və onunla bağlı olan maraqlı və gülməli hadisəni danışır.