“İnsan qətlini qəbul etmirəm, ancaq bu gün, şair olanlar məhz meyxanaçılardır”.
Bu sözləri yazıçı Həmid Herisçi Ednews-a açıqlamasında şair Oğuz Ayvazın meyxana haqda tənqidi fikirlərinə cavab bildirərkən söyləyib. O, daha sonra əlavə edib:
“Bu gün meyxanaçılardı milyonları öz ardlarıca aparan, xalqın poeziya payını ödəyən, zülmə baş əyməyən, acı sözü üzə deyənlər. Azərbaycan yazıçı-şairləri çoxdan təhlükəli deyillər. Şair həyatının gərgin dramaturgiyasından, sadə dillə desək, şair taleyindən bizim ştatlı şairlər çoxdan - hələ 1937-ci ildən üzübəri əllərini üzüblər. Şair taleyini bizdə sonuncu dəfə Müşfiq yaşayıb, sonra Əliağa Vahid. Sonra bir nəfər də qələt edib bu taleyin böyründən yel olub keçə bilməyib. Şair taleyinə o vaxtdan bəri bizdə meyxanaçılar yiyələnib”.
H.Herisçi qeyd edib ki, meyxanaçılar xalqla öz aralarındakı məsafəni xeyli qısaldıblar.
“İndi xalq “şair” deyəndə gözü qarşısına yalnız meyxanaçıları gətirir. Ədəbi saytların təbliğ etdiyi imzaları əsla tanımır. Sərbəst vəzndə, qafiyədə yazan şairləri indi nə dövlət maliyyələşdirir, nə də sadə xalq. Bu gün xalqın sevgi hədəfi, bəli, bu həqiqətdir - meyxanaçılardır”.
Qeyd edək ki, meyxanaçı Rəşad Dağlının qonşusunu qətl etməsi yenidən meyxana mövzusunu gündəmə gətirib.