Geridə qoyduğumuz V Milli Kitab Sərgisi cəmiyyətdə böyük marağa səbəb oldu.
İçərişəhərdə baş tutan və 9 gün davam edən kitab festivalı çərçivəsində yazıçı və şairlərlə görüşlər keçirildi, tanınmış şəxslərin iştirakı ilə müxtəlif mövzuları əhatə edən panel müzakirələri baş tutdu.
Sərgidə iştirak edən məşhur simalardan bir neçəsi öz təəssüratlarını Ednews-la bölüşüb:
Şair Qismət
“V Milli Kitab Sərgisi lokasiya baxmınından maraqlı məkanda təşkil edilmişdi. Şəhərin mərkəzində, qədim tarixə malik İçərihərdə nəhayət ki, Azərbaycan kitabı ilə bağlı tədbir keçirildi. Bu mənada müsbət qiymətləndirmək olar. Təşkilatçıların minimum imkanlarla maksimum dərəcədə zəhmət çəkdiyi açıq-aşkar görünürdü. “Qanun” nəşriyyatının əməyi olan hər bir əməkdaşını təbrik edirəm. İdeal səviyyədə deyildi, bəzi məqamlar yerinə oturmayıb. Hələ o səviyyəyə çatmamışıq ki, panel müzakirələrinə dəvət olunan şəxslər qonarar qarşılığında dəvət edilsin. Cəmiyyətdə müəyyən nüfuza malik, kimlərinsə dostu-tanışı olan şəxslər məruzəçilər idi. Bu qapalı çevrədən hələ çıxa bilməmişik. Təcrübə artdıqca bu məsələlər də zamanla öz həllini tapacaq. Müşahidələrimə əsasən deyə bilərəm ki, açılış günü və son günlərdə aktivlik daha çox idi. Şəhərin mərkəzi hissələrində belə tədbirlərin təşkili təqdirəlayiqdir. Davamlı olmalıdır bu təşəbbüslər. Hər zaman deyirəm ki, mədəniyyətdə ən vacib olan davamlılıq və mütəmadilikdir. Bu davamlılığa nail ola bilsək, təqvi ili boyunca kitabla bağlı tədbirlərin sayını artıra bilsək, daha sürətli nəticələr əldə edə bilərik. Ümid edirəm ki, yerli müəlliflərin də belə tədbirlərdən qazanc götürə biləcəyi səviyyəyə gəlib çatarıq”.
Aktyor Azər Aydəmir
“Düşünürəm ki, təşkilatçılıq yüksək səviyyədə idi. Hər il bu milli kitab sərgisi daha da böyüyür. Həm məkan, əhatə dairəsi, həm də müəllflərin, piştaxtalardakı kitabların sayı olaraq. Əvvəllər qapalı yerlərdə keçirilirdi, bu dəfə artıq yay festivalına çevrildi. İçərişəhərdə keçirilməsi əlamətdardır. Məncə, bu tədbirin insanlarda kitablara, mütaliəyə marağı artırmaqda böyük rolu var. Hər il daha geniş miqyas alacağını təxmin edə bilərik. İçərişəhər həm turistlərin, həm də yerli sakinlərin ən çox üz tutduğu məkanlardandır. Təsadüfən də olsa oradan keçən insanların diqqətini cəlb edirdi, bu özü bir uğurdur. Yüzlərlə təəccüblü sima gördüm orada. Ölkədə naşirlik, gənc müəlliflər, yeni kitablar varmı? İnsanımız bu barədə çox məlumatlı deyil. Bu tədbir sayəsində bir çoxu gördü ki, Azərbaycan ədəbiyyatı hər zaman olduğu kimi indi də var. Bu təəccübdən doğan ciddi alış-verişin də şahidi oldum. Çox bəyəndim. Bu sərginin təşkilatçılarına və zəhmət çəkən hər kəsə uğurlar arzu edirəm”.
Jurnalist, səyahətçi Azər Qərib
“Təşkilatçılığı çox əla qiymətləndirirəm. Təqdirəlayiq tədbirdir. İşə gedib gələndə oradan keçirdim. Maraq böyük idi, insanlar gəzirdilər, baxırdılar, kitab alırdılar. Faydalı çıxışlar təşkil edilmişdi. Tanınmış yazarların oxucularla görüşləri baş tutdu. Qeyd edim ki, cəmiyyətdə kitaba marağın artması sevindirici haldır. Həmişə xaricə gedəndə onların zəngin kitab mağazalarını, alıcıların çoxluğunu gördükcə həsəd aparırdım. Artıq bizdə də kitab mağazalarının, kitabsevərlərin sayı artır. Tədbirin təşkilatçılarına təşəkkürümü bildirirəm. Növbəti illərdə də belə kitab bayramlarının keçirilməsini istərdim”.
Şair Şəhriyar Del Gerani
“Hər şey çox yüksək səviyyədə təşkil olunmuşdu. Bakının gözü hesab edilən İçərişəhərdə belə bir sərginin təşkil olunması turistlərin də diqqətini çəkdi. Bu, həm də ölkənin imicini formalaşdırır. Xaricdən gələn adamlar gördülər ki, Azərbaycan təkcə neft ölkəsi deyil, həm də kitab diyarıdır. Bütün kitab təqdimatları, panellər yüksək maraqla qarşılandı. Bütün bu tədbirlər həm yazarların, həm də oxucuların bayramıdır. Hamını təbrik edirəm. Eşqlər!”
Törə Zeynal