Azərbaycan Respublikasının Prezidenti İlham Əliyevin 2024-cü il 2 fevral tarixli Sərəncamı ilə Beynəlxalq Avrasiya Mətbuat Fondunun və Ednews portalının Orta Asiya nümayəndəsi, tanınmış özbək yazıçı-publisist Şuxrat Barlas "Heydər Əliyevin 100 illiyi” yubiley medalı ilə təltif edilib.

Ednews-un verdiyi xəbərə görə, təltif edilmə Özbəkistanda keçirilib. 

Şuxrat Barlas 2015-ci ildən beynəlxalq informasiya agentliyi "EURASIA DIARY"-nin Mərkəzi Asiya üzrə xüsusi müxbiri kimi Özbəkistan və Azərbaycan arasında dostluq və qardaşlığın möhkəmləndirilməsi missiyasını yerinə yetirir. 

Uzun illər fondla əməkdaşlıq edən Şuxrat Barlas kitabları ilə, məqalələri ilə erməni terrorizmi, daşnakların azərbaycanlıların başına gətirdikləri müsibətləri, erməni yalanları haqda yazıları ilə xidmətləri olub. Onun sayəsində Qarabağla bağlı, Azərbaycanla bağlı həqiqətlər türk dünyasında və postsovet məkanında ciddi marağa səbəb olub.

Beynəlxalq Avrasiya Mətbuat Fondu və Fondun prezidenti Umud Mirzəyev bu münasibətlə Şuxrat Barlası təbrik edib, uğurlarının davamını arzulayıb. 

Xatırladaq ki, Salamov Şuhrat Nəsir oğlu BARLAS yeganə Özbəkistanlı şəxsdir ki, illərlə “AzTV”, “İctimai TV”, “Lider TV”, “Xəzər TV”, “CBC TV” və digər informasiya-analitik resurslarda Qarabağ haqqında verilişlərin yaradılmasına birbaşa ekspert-məsləhətçi olaraq köməklik göstərmişdir. Eyni zamanda, yeganə Özbək müəllifdir ki, Qarabağ müharibəsinin mənşəyinin tarixi, etnik münaqişə və müharibənin nəticələri ilə bağlı dünyanın müxtəlif media resurslarından özbək, azərbaycan, türk, rus və ingilis dillərində 1000-dən çox məqalə dərc etdirmişdir. İkinci Qarabağ müharibəsi zamanı o, 44 gün ərzində sosial şəbəkələrdən və dünyanın müxtəlif media resurslarından çox sayda video kontentlər yaradaraq nümayiş etdirib.

Qeyd edək ki, jurnalistika sahəsində türk dünyası üçün müstəsna xidmətlərinə görə Şuxrat Barlas bundan əvvəl Türk Dövlətləri Təşkilatının “Türksoy” beynəlxalq mükafatına da layiq görülüb.