1 Aprel Ümumdünya Gülüş, aldatma günüdür. Bu özəl günlə bağlı yazıçılar arasında sorğu keçirdik. Kimi aldadıblar və aldanıblar? Bu özəl günlə bağlı nə kimi xatirələri var?
Ednews sorğunun cavablarını təqdim edir.
Aqil Abbas:
"Bu gün gülüş günü yox, aldatma günüdür. Yadımda qalan isə budur ki, mənim doğum günümdür. Hər zaman belə bir fikir səsləndirirəm ki, 365 gün yalan danışırıq, heç olmasa 1 apreldə düz danışaq. Bir dəfə bir dostumuzu aldadıb Mərdəkanda xaş yemək adı ilə çağırmışdıq. O da geyinib keçinib deyilən məkanı axtara-axtara qalmışdı. Bir saat axtardıqdan sonra zarafat olduğunu dedik. Bu günlə bağlı xatırladığım tək hadisə budur".
Fəxri Uğurlu:
"Məni heç kim aldatmayıb, aldanmışamsa da, könüllü aldanmışam. Aldatmağıma gəlincə, ən sonuncu təqribən il yarım qabaq bir qohumumu, həm də uşaqlıq dostumu aldatmışam. Ona xəstəliyinin müvəqqəti olduğunu, sağalacağını deyəndə".
Cəlil Cavanşir:
"Xüsusi olaraq aldatmaq bacarığım yoxdur. Yalan danışan kimi ifşa olunuram. Bu xüsusi bacarıqdır və bacarmaq istərdim. Aldanmağım isə çox olub. Bütün aylarda, bütün fəsillərdə aldanmışam. Xüsusilə 1 apreldə aldadan olmayıb. Hələki yaşadığıma görə hər an aldadılmağa hazıram. Aldatmağı isə düşünmürəm. 1 aprel zarafatı üçün vaxt, hövsələ lazımdır. Mən də isə heç biri yoxdur".
Narıngül Nadir:
"1 Aprel -Ümumdünya gülüş günü, həm də aldatma günüdür. Hətta Böyük Britaniyada bu günü “səfehlər günü” də adlandırırlar. Gülüş bir az da insanın xarakterini göstərir. Adam var belə zarafatlara gülə bilir, adam da var əksinə qıcıqlanır. Amma əksər insanlar bir anlıq da olsa stress ata bilirlərsə, bu çox yaxşıdır. Gülüş günündə mənim də həyatımda xırda-para aldatmalar, zarafatlar olub. Tələbə vaxtı qrup yoldaşlarımdan biri mənə yaxınlaşdı ki, dekan təcili səni səni çağırır. Mən də tənginəfəs özümü içəri atdım. Dekan da çox sərt adam idi. Adam təəccüblə qaşlarını çatıb üzümə baxdı, soruşdu ki, nə lazımdır? Özümü itirdim, dedim siz çağırmısız.
-Mən???
-Bağışlayın, - deyib, otaqdan çıxdım. Hətta o tələbə yoldaşımla bir müddət küsülü də qaldım. Amma sonra yadımıza salıb o ki var gülürdük. Hər halda, 1 Aprel güldürə bilir".
Oğuz
