Dünya Bankı ilə Avropa İnvestisiya Bankı (EIB) Trans-Anadolu qaz boru kəməri (TANAP) layihəsinin maliyyələşdirilməsində iştirak edə bilərlər.
“hurriyet.com.tr” saytı xəbər verir ki, Dünya Bankı TANAP-a 1 milyard dollar, Avropa İnvestisiya Bankı isə 1 milyard avro maliyyə dəstəyi göstərməyi nəzərdə tutur.
Qeyd edək ki, bu məsələ ilə bağlı TANAP-ın baş direktoru Saltuk Düzyol "Azərtac"a eksklüziv müsahibəsində demişdi: “TANAP-ın maliyyələşdirilməsi ilə əlaqədar layihə üzrə şəriklərimizin beynəlxalq maliyyə təşkilatları ilə apardıqları ikitərəfli müzakirələr çərçivəsində hələ də layihə üçün qiymətləndirmə prosesi davam etməkdədir. Neftin qiymətlərinin sürətlə ucuzlaşdığı və neft-qaz sektorunda yeni investisiyalar baxımından bir çox mənfi vəziyyətin yarandığı bir dövrdə Avropa İnvestisiya Bankının TANAP-a marağı istər Aİ-nin, istərsə də bankın layihəyə verdikləri önəmi və etibarı nümayiş etdirir. Aİ-nin enerji təhlükəsizliyinin təmin edilməsi və şaxələndirilməsi baxımından strateji əhəmiyyətə malik olan “Cənub Qaz Dəhlizi”nin ən mühüm hissələrində birini təşkil edən TANAP layihəsi, heç şübhəsiz beynəlxalq maliyyə təşkilatları tərəfindən də fərqli bir baxış bucağı üzrə qiymətləndirilir. Dünya Bankı ilə danışıqlar Avropa İnvestisiya Bankında olduğu kimi qiymətləndirmə prosesi üzrə davam etməkdədir. Bu mövzu ilə bağlı əldə olunan məxfilik razılaşmalarına görə, hazırkı proses barədə daha ətraflı məlumat verilmir”.
Xəzər dənizinin Azərbaycan sektorundakı “Şahdəniz-2” yatağından çıxarılan qazı Türkiyəyə və bu ölkədən Avropaya nəql edəcək TANAP-ın uzunluğu (19 kilometri Mərmərə dənizindən keçməklə) ümumilikdə 1850 kilometr olacaq. Boru kəməri Türkiyənin Gürcüstanla sərhədindəki Ardahan vilayətinin Posof mahalından başlayaraq 21 vilayətdən keçməklə qardaş ölkənin Yunanıstanla sərhədindəki Ədirnə vilayətinin İpsala qəsəbəsinədək uzanacaq. TANAP-ın 2018-ci ildə istismara verilməsi planlaşdırılır. TANAP-la Avropaya 10 milyard, Türkiyəyə isə 6 milyard kubmetr Azərbaycan qazının nəqli nəzərdə tutulur. Boru kəmərinin ötürücülük qabiliyyətinin gələcəkdə illik 24 milyard kubmetrə, daha sonra isə 31 milyard kubmetrə çatdırılması planlaşdırılır. TANAP layihəsinin ümumi dəyəri 10 milyard dollar qiymətləndirilir. Layihədə 1,2 milyon ton ağırlığında ümumilikdə 150 min polad boru istifadə olunacaq.
TANAP Cənubi Qafqaz Boru Kəmərindən (CQBK) alacağı təbii qazı 2020-ci ilin əvvəlindən etibarən “Trans-Adriatik” (TAP) qaz boru kəmərinə qoşularaq Yunanıstan, Albaniya və İtaliyadan keçməklə Avropaya çatdıracaq.
TANAP-ın səhmdarlarının bu layihədə payı belədir: “Cənub qaz dəhlizi” Qapalı Səhmdar Cəmiyyəti (QSC) - 58 faiz, “Botaş” - 30 faiz və BP şirkəti - 12 faiz.
"Azərtac"
