Xəbər verdiyimiz kimi, Azərbaycanın İqtisadiyyat Nazirliyi və Səudiyyə Ərəbistanının İnkişaf Fondu arasında Anlaşma Memorandumu imzalanıb. Memorandumda Fondun ölkəmiz üçün prioritet olan sahələr üzrə inkişaf layihələrinin maliyyələşdirməsi üzrə əməkdaşlıq məsələləri öz əksini tapıb.

Bu müqavilənin Azərbaycan iqtisadiyyatı üçün müsbətyönümlü dəyişikliyi gözlənilirmi? Ednews bu barədə iqtisadçı-ekspertin şərhini öyrənib.

Odlar Yurdu Universiteti "İqtisadiyyat və iqtisadi münasibətlər" kafedrasının baş müəllimi, iqtisadçı ekspert Aslan Əzimzadə açıqlamasında bildirdi ki, bu gün ölkələrin dayanıqlı inkişafını şərtləndirmək üçün əsas kapitala yönəlmiş investisiya və kredit xəttlərinin davamlılığını təmin etmək olduqca önəmlidir. Bu səbəbdən düşünürəm ki, Azərbaycanın Səudiyyə İnkişaf Fondu ilə Anlaşma Memorandumu imzalaması sözügedən istiqamətdə kredit xəttlərinin həcminin artırılmasına və iqtisadiyyatın müəyyən sektorlarının inkişafı üçün maliyyə vəsaitinin təmin edilməsinə olduqca önəmli töhfə verə bilər.

“Biz bilirik ki, hal-hazırda Qarabağda yenidən qurma və bərpa işləri aparılır. Böyük kənd təsərrüfatı potensialı olan Qarabağda sözügedən kreditlərdən istifadə edilə bilər. Lakin düşünürəm ki, burada artıq ənənəvi istiqamətdə yox məhz yeni innovativ sahələrə əsaslanan inkişaf nəzərə alınmalıdır. Belə ki, əgər kənd təsərrüfatı istiqamətinə bio-,nanotexnologiyaları o cümlədən hüceyrə mühəndisliyinin ən son yeniliklərini tətbiq etsək daha yüksək məhsuldarlıq əldə edə bilərik ki, bu da öz növbəsində həm ərzaq təhlükəsizliyini daha dayanıqlılığını təmin edə bilər həm də idxal həcmini müəyyən qədər azalda bilər. Dünya iqtisadiyyatında mövcud olan yeni reallıqlar çərçivəsində Azərbaycanın makroiqtisadi göstəricilərində baş verən yüksək artım templəri məhz kredit təşkilatlarının da marağındadır ki, biz bunu Səudiyyə İnkişaf Fondu çərçivəsində görə bilirik”.

Oğuz Ayvaz