Deputat Rüfət Əliyev öz əmanətlərini banklarda saxlayanların vergiyə cəlb olunmasına etiraz edib.  O, qeyd edib ki, əgər vətəndaş banka qoyduğu əmanətinin aylıq gəliri üçün vergi ödəyəcəksə, bu dərhal onun cibinə təsir edəcək və o, əmanətini yenidən dədə-baba qaydası ilı “balışının altında” saxlamağa üstünlük verəcək. Bu isə bankların işini bir xeyli çətinləşdirəcək.

Məsələ ilə bağlı daha ətraflı danışan deputat Ednews-a açıqlaması zamanı bildirib ki, sözügedən gəlirlər 2016-cı il fevralın 1-dən 7 il müddətinə vergidən azad edilmişdir. Müddət bitdikdən sonra isə yenidən vergi məsələsi müzakirə olmağa başlanılıb.

“Əhalinin banklardakı depozit gəlirlərinə vergilərin təyin olunması "əmanətlər azalacaq" qorxusu yarada bilər. Azərbaycanda 7 il idi ki, əmanətlərin vergiləri ilə bağlı moratorium vardı. Bu, öz müsbət rolunu oynadı. 2016-cı ildən bu günə qədər banklarda əmanətlər 6 milyard manatdan 12 milyard manata qədər artıb. Bu, Azərbaycan manatına, Azərbaycan banklarına inamı artırdı. İndi əmanətlərin vergiyə cəlb edilməsinə qoyulan moratoriumun vaxtı bitib. Əmanətdən gələn qazanca verginin tətbiqi edilməsi xəbərləri yayılıb.  Biz bu barədə düşünməliyik. Biz Mərkəzi Bankın fikrini öyrənmək istəyirik. Çünki məsələ insanlara aydın deyil, onların bir çoxu əmanətlərini banklardan çıxarır. Bu da o deməkdir ki, yaxın vaxtlarda yenə də bəzi banklarda çətinliklər yarana bilər. Bunun üzərində düşünmək lazımdır”.  

 Deputat bildirib ki, ümumi məlumata görə, il ərzində əmanətlərdən verginin həcmi 49-50 milyon manatdır. 

“Hesab edirəm ki, vətəndaşlar depozitlərini geri götürsə  banklar  problemlərlə üzləşə bilərlər.  

Bu morotoriumun  yenidən uzadılması düşünülməlidir. Burada Mərkəzi Bank Maliyyə Nazirliyi və İqtisadiyyat Nazirliyi bu məsələ üzərində işləməlidirlər”.

Ayan Rzayeva