Ermənistanın baş naziri Nikol Paşinyan noyabra qədər sülh sazişinin imzalanması ehtimalına olduqca pozitiv baxır. Bəs beynəlxalq ekspertlər bunun mümkünlüyünü necə dəyərləndirirlər?
Ednews mövzu ilə bağlı sorğu keçirib:
ABŞ - da yaşayan rus əsilli siyasi analitik Endryu Koribko:
“Paşinyan Azərbaycanla sülh sazişi bağlamaq və hakimiyyətdə qalmaq üçün erməni cəmiyyəti üzərində millətçi diaspor lobbisinin təsirini, oradakı xarici kəşfiyyat orqanlarının “QHT-lər” vasitəsilə təsirini, kəskin mənfi ictimai rəyi dəf etməlidir. Bu çağırışlar dəf edilməz deyil, lakin onlar həqiqətən də çox təhlükəli görünür və Paşinyanın bunuin uğurla öhdəsindən gələ biləcəyi də bəlli deyil. Bunu işğal olunmuş dörd kəndin Azərbaycana qaytarılması ilə bağlı razılaşmasına etirazları sübut edir. ABŞ və Fransa kimi bəzi kənar aktorlar ərazi mübahisələrini davam etdirməklə regionu parçalamaqda və idarə etməkdə maraqlıdırlar. Məhz onlar Paşinyana təzyiq göstərirlər ki, Azərbaycanla güzəştə getməsin. Bu prosesi də təşviq etmək üçün hərbi və iqtisadi yardım vədləri verirlər. Həmin bu illər ərzində Nikol Paşinyan ölkəsinin suverenliyinin bir hissəsini həmin aktorlara təslim etməklə özünü bir dilemma içində tapdı. Bu da onun Azərbaycanla sülh sazişi imzalanmasına dair proseslərdə onu məhdudlaşdırdı. Hərçənd, nəhayət indi proseslə daha səmimi şəkildə maraqlanır”.
Cənubi Qafqaz Araşdırmalar Mərkəzinin direktoru Fərhad Məmmədov:
“Azərbaycan məhz sülh sazişi üçün lazım olan şərtləri artıq elan edib. Bu, konstitusiya, qanunvericiliyin və rəsmi sənədlərin dəyişikliyidir. Hal-hazırda biz görürük ki, Ermənistanda konstitusiya dəyişikliyi haqqında müzakirələr getmir. Onlar ancaq parlamentdə 1992-ci ildə qəbul edilmiş qərarları ləğv edə bilərlər və hal-hazırda olan sənədlərdə Qarabağın adını çıxarda bilərlər. Lakin bilmirəm, bu proses Azərbaycana nə qədər kifayət edəcəkdir. Hərçənd digər mövzularla bağlı irəliləyiş əldə oluna bilər. Sərhədlərin müəyyən edilməsi prosesində artıq irəlləyiş mövcuddur və yaxud nəqliyyat kommunikasiya məsələlərində də eyni zamanda. Hansısa bir irəliləyişə nail olmaq mümkündür. Ona görə birbaşa sülh sazişi ilə bağlı o qədər də nikbin deyiləm”.
Erməni politoloq İşxan Verdiyan:
“Hesab edirəm ki, Paşinyan hakimiyyətdə qalarsa, sülh müqaviləsinin imzalanması qaçılmazdır. Artıq bu proses necə deyərlər, bir maşın kimi işə salınıb. Geriyə dönüş isə yoxdur, geriyə yeganə yol həbsxanadır və Paşinyan bunu çox gözəl bilir. Ona görə də sülh müqaviləsinin il sonuna kimi imzalanmasına olduqca pozitiv baxıram!”
Əkbər Novruz
