Dünyanın yoxsul ölkələri üçün ərzaq idxalı azalacaq.

Ednews Skynews-a istinadən xəbər verir ki, bunu Birləşmiş Millətlər Təşkilatının Ərzaq və Kənd Təsərrüfatı Təşkilatı bildirib. 2023-cü ildə qarğıdalı, süd və ya ət istehsalının qlobal səviyyədə artması qiymətlərə də təsir etdiyindən ən yoxsul ölkələr üçün ərzaq idxalı azaldılacaq.

Təşkilat yarımillik hesabatında bildirib ki, bu il xüsusilə Afrikanın az inkişaf etmiş 47 ölkəsinin fakturalarının 1,5% azalacağı gözlənilir.

Tunis, Misir, Pakistan və Türkiyə kimi inkişaf etməkdə olan xalis ərzaq idxalçısı ölkələrdə isə təxminən 5%-ə qədər azalma yaşana bilər. Bu ölkələrdə ərzaq idxalının azalması alıcılıq qabiliyyətinin aşağı düşməsi ilə əlaqəlidir.

Dünyanın ən kasıb ölkələrində tələbatın artdığı ərzaqlar isə meyvə, tərəvəz və süd məhsullarıdır.

Təşkilat vurğulayıb ki, bir sıra əsas ərzaq məhsulları üzrə qiymətlər dünyada aşağı düşsə də yerli bazarlarda bu müşahidə olunmur, əksinə bəzi məhsulların qiyməti artmağa davam edir.

Qlobal miqyasda ərzaq idxalı xərclərinin 2023-cü ildə yeni yüksək həddə çatacağı proqnozlaşdırılır, baxmayaraq ki, bu il keçən illə müqayisədə daha yavaş artım gözlənilirdi.

2023 və 2024-cü illərdə mal əti istisna olmaqla düyü, taxıl, şəkər, süd və ət istehsalının daha çox olacağı gözlənilir.

Rusiya və Avstraliyada məhsuldarlıq zəiflədiyi üçün keçən mövsümdə qeydə alınan rekorddan sonra buğda istehsalının da 3% azalacağı gözlənilir.

Törə Zeynal