2024-cü ildə Azərbaycanda baş verəcək siyasi dəyişikliklər öz növbəsində iqtisadi inkişaf da gətirəcək. Ümumi olaraq ölkənin hansı sənaye sahələrində əhəmiyyətli artım müşahidə olunacaq?
Bu barədə Ednews-a öz açıqlamasında iqtisadç-ekspert Elman Sadıqov bildirib ki, Böyük Qayıdış layihəsi ölkə iqtisadiyyatında yeni qapılar açacaq:
“Hər il olduğu kimi il ərzində baş verən hadisələri nəzərə alaraq növbəti il üçün iqtisadi proqnozlar verilib. 2024-cü il Azərbaycan üçün Yaşıl Enerji ili olacaq. Azərbaycanın hal hazırda bir çox iqtisadi rəqibləri var. Buna görə də biz yeni iqtisadi əlaqələrə hazır olmalıyıq. Gələn il Azərbaycanda qeyri-neft sektoru əhəmiyyətli dərəcədə inkişaf edəcək. Təbii ki, böyük qayıdış bizim üzümüzə yeni layihələr açacaq və Qarabağda yaşıl zona ölkə iqtisadiyyatında vacib rola sahib olacaq. Qarabağda yaradılacaq alternativ enerji mənbələri stansiyaları, düşünürəm ki, növbəti ilin əsas iqtisadi məsələsinə çevriləcək. Alternativ enerji məsələsində bütün dünya dövlətləri rəqabət aparmaqdadır və elə buna görə də sahə ilə bağlı mütəxəssislərin ölkəyə yönəldilməsi vacib olacaq. Əlbəttə, COP29-un Bakıda keçirilməsi Azərbaycanın alternativ enerji sahəsində ciddi inkişaf potensialı yaradacaq. Bu, ətraf mühitin qorunması, ekologiya fərqindəliyinin artırılması və eləcə də, sənaye tullantılarının iqtisadi dəyərə çevrilməsi ən önəmli faktorlardan olacaq. Yenidən emal olunan malların bazara çıxarılması və onların daxili təlabatın ödənməsində yer alması alternativ enerji ilə birgə ekoloji təmiz energetikanı ön plana çıxaracaq. Təbii ki, yaranacaq yeni iş imkanlarını qeyd etməmək olmaz. Bizə həm də yeni təcrübəli mütəxəssislər lazım olacaq”.
Ekspert bildirdi ki, işğal azad edilmiş ərazilərdə sənayenin yenidən işə salınması və Ermənistanla normal əlaqələrin yaradılması Azərbaycan iqtisadiyyatında əsas faktor olacaq.
“Azərbaycan iqtisadiyyatını gücünü həm də Ermənistanla sülh müqaviləsi bağlandıqdan sonra müşahidə edəcəyik. İki ölkə arasında əlaqələrin normallaşması regionda daha sağlam və etibarlı münasibətlərin yaranmasına təkan verəcək. Yolların açılması Azərbaycana alternativ enerjini xarici dövlətlərə ixrac etməyə imkan yaradacaq. Son illərdə baş verən hadisələri nəzərə aldıqda ölkəmizdən Avropaya ixrac edilən enerjinin və məhsulların həcminin əhəmiyyətli dərəcədə artacağı gözlənilir. İqtisadiyyatın əsas dayağı hər zaman emal sənayesidir. İşğaldan azad edilmiş torpaqlarda geri qaytarılmış mədənlərin yenidən istifadəyə verilməsi Azərbaycanda sənayenin inkişafına gətirib çıxaracaq. Növbəti il ÜDM-də 2023-cü ilə nəzərən 3.5 fazilik bir böyümə gözlənilir. Mərkəzi Bankın açıqlamasına görə inflyasiya dərəcəsi 5-5.5 faizdir. İnflyasiya artımının qarşısının alınması təbii ki, ÜDM-ə öz təsirini verəcək”.
Fərid Axund