Martın 24-də Rusiya Federasiyasının media subyektlərinin əməkdaşları - “İzvestiya” qəzetinin hərbi müxbiri Aleksandr Fedorçak, “Zvezda” telekanalının operatoru Andrey Panov və çəkiliş qrupunun sürücüsü Aleksandr Sirkeli həlak olub, “Zvezda” telekanalının müxbiri Nikita Qoldin isə ağır yaralanıb.
Bu hadisə ilə bağlı Medianın İnkişafı Agentliyi başsağlığı verib.
Ednews xəbər verir ki, başsağlığında deyilir: “Azərbaycan Respublikasının Medianın İnkişafı Agentliyi bu faciəvi hadisədən dərin kədərini bildirir və vəzifə borcunu yerinə yetirərkən həyatını itirmiş media nümayəndələrinin yaxınlarına və Rusiyanın media ictimaiyyətinə başsağlığı verir. Yaralanan jurnalistin tezliklə sağalmasını diləyirik.
Həmçinin qeyd edirik ki, münaqişə zonalarında jurnalistlərin təhlükəsizliyi mühüm məsələdir. Azərbaycan mediası da buna bənzər itkilərə məruz qalmışdır, məsələn, 1991-ci ildə “Molodyoj Azerbaydjana” qəzetinin müxbiri Salatın Əsgərova və 2021-ci ildə Kəlbəcərdə həlak olan Məhərrəm İbrahimov və Sirac Abışov.
Medianın İnkişafı Agentliyi jurnalistlərin hər hansı münaqişə zonasına getmələrinə baxmayaraq, onlara təhlükəsiz şəraitin təmin olunmasını vacib hesab edir.”
Fatimə Şükürova // EDnews
