BMT-nin Nyu-Yorkdakı baş qərargahında Azərbaycanın mina problemi ilə bağlı brifinqi pozmağa cəhd edən erməni diplomata tutarlı cavab verilib.
“EDnews” xəbər verir ki, bunu “Report”un ABŞ bürosuna açıqlamasında Beynəlxalq Münasibətlərin Təhlili Mərkəzinin İdarə Heyətinin sədri Fərid Şəfiyev deyib.
F.Şəfiyev vurğulayıb ki, Ermənistan Azərbaycanın mina məsələsini guya siyasiləşdirdiyini iddia etsə də, faktlar bunun əksini göstərir: "Azərbaycan ərazisində yüz minlərlə mina yerləşdirilib və bu minaların böyük əksəriyyəti Ermənistan tərəfindən yerləşdirilib. Təbii ki, bu fəaliyyətlər Ermənistanda narahatlıq doğurur. Düşünürəm ki, Azərbaycan hökuməti mina problemini dünya ictimaiyyətinin diqqətinə çatdırmaq istiqamətində olduqca fəal addımlar atır. Hazırda Vaşinqtonda ANAMA nümayəndələri fəaliyyət göstərir və bu istiqamətdə məlumatlandırma işi intensiv şəkildə davam etdirilir. Belə tədbirlərin əsas məqsədi bu problemin beynəlxalq ictimaiyyətin diqqətinə çatdırılmasıdır. Ermənistan tərəfi də əks tədbirlər görməyə çalışır. Tədbir zamanı Ermənistan nümayəndəsinə tutarlı cavab verildi. Eyni zamanda brifinqdə iştirak edən bir sıra ölkələrin - Nikaraqua, Pakistan, Türkiyə və İtaliyanın nümayəndələri Azərbaycanın mövqeyini dəstəklədiklərini açıq şəkildə ifadə etdilər”.
F.Şəfiyev bildirib ki, Azərbaycanda Minalardan Təmizləmə üzrə Beynəlxalq Mükəmməllik və Təlim Mərkəzinin açılması planlaşdırılır: "Mən öz çıxışımda bu təşəbbüsdən bəhs etdim. Azərbaycan torpaqlarının minalardan təmizlənməsi zamanı biz yeni texnologiyaları tətbiq etməklə mühüm təcrübə toplayırıq. Bu təcrübənin Afrika, Asiya və digər region ölkələrinə də ötürülməsi nəzərdə tutulur. Bu sahədə BMT institutları, o cümlədən bir sıra özəl donorlar, xüsusilə də ABŞ-dən olan donorlar, minaaxtaran itlərin alınmasında fəal iştirak edirlər. Başlanğıc mərhələdə bu fəaliyyətlər Azərbaycanda həyata keçiriləcək”.
F.Şəfiyev qeyd edib ki, hazırda Azərbaycanda mina təmizləmə işlərinin 94 %-i ölkənin öz resursları hesabına həyata keçirilir, yalnız 6 %-i beynəlxalq dəstək vasitəsilə mümkün olub: "Kamboca və Kolumbiya kimi ölkələrlə müqayisədə Azərbaycana beynəlxalq dəstək hələ də olduqca azdır. Halbuki bizə texniki vasitələr, treninqlər, minaaxtaran itlər və digər vasitələr üzrə yardım vacibdir. Təəssüf ki, keçmiş münaqişə kontekstində ikili standartlarla üzləşirik və bu, bu gün də davam edir”.
O əlavə edib ki, Avropa İttifaqının Ermənistana göstərdiyi yardımın həcmi də ikili standartlara bariz nümunədir: "Halbuki Ermənistan ərazisində genişmiqyaslı münaqişə olmayıb. Bütün dağıntılar və mina təhlükəsi Azərbaycan ərazisində cəmlənib. Azərbaycan olaraq bizdə bu problemi həll etmək üçün iradə və resurslar mövcuddur. Sadəcə zaman tələb olunur. Əsas prioritetimiz isə məcburi köçkünlərin təhlükəsiz şəkildə doğma yurdlarına qayıtmasını təmin etməkdir”.
