Xankəndidə VII ADA Siyasi Forumu çərçivəsində "Yeni dünya nizamı: İqtisadi transformasiya və rəqəmsal inqilabdan gözləntilər" mövzusunda panel sessiya keçirilib.

“EDnews” xəbər verir ki, tədbirə moderatorluğu ADA Universitetinin prorektoru, Milli Məclisin deputatı Fariz İsmayılzadə edib.

Astana Beynalxalq Maliyyə Mərkəzinin (AIFC) rəhbəri Renat Bekturov çıxış edərək qurumun fəaliyyət istiqamətindən söz açıb və bildirib ki, bu, sərmayədarları cəlb etmək, maliyyə sahəsini inkişaf etdirmək üçün dövlətlərarası bir təşkilatdır:

“Bölgə iqtisadiyyatı ölkəmizin iqtisadiyyatının böyüməsinə kömək edə bilər. Hazırda maliyyə mərkəzində təxminən 4 min şirkət qeydiyyatdan keçib. Bizim qiymətli kağızlar birjası var. Mərkəzdə bir neçə maliyyə qurumu fəaliyyət göstərir. Biz həm də hökumətin maliyyə və inkişaf sahəsində məlumatlarla dəstəklənən siyasəti həyata keçirməyə çalışırıq. Hökumətimizə qərar vermək üçün bir platforma kimi xidmət edə bilərik”.

Spiker nəqliyyat və logistika sahəsində fəaliyyətlərinə diqqət çəkərək bu istiqamətdə bir neçə birgə müəssisənin yaradılmasında iştirakçı olduqlarını vurğulayıb:

“Bu müəssisələr şərq və qərb arasında dəhlizləri inkişaf etdirmək məqsədini güdür. Bu, mədəniyyətin, ideyaların və maliyyə kapitalının dəyişməsi deməkdir”.

Alman Federal İqtisadi İnkişaf və Xarici Ticarət Assosiasiyasının rəhbəri Urs Unkauf isə, öz növbəsində, forumun önəmini vurğulayaraq bildirib ki, Xankəndi şəhərində keçirilən bu konfrans iştirakçı ölkələr arasında geniş əməkdaşlıq körpülərinin yaradılmasına imkan verəcək:

“Almaniya ilə Azərbaycan arasında mühüm tərəfdaşlıq əlaqələri var. Biz bu münasibətin daha da inkişafında maraqlıyıq. Almaniya həm süni intellekt, həm də rəqəmsallaşma sahəsində mühüm potensiala malikdir. Bu gün bütün ölkələr qlobal dəyişikliklərlə üz-üzə olsa da, biz gələcəyə nikbin baxırıq. Dünyada baş verən dəyişikliklər narahatlıq doğurmaya bilməz. Bu kontekstdə ölkələr arasındakı əməkdaşlığın daha da genişləndirilməsi önəmlidir”.

Urs Unkauf ötən il Azərbaycanın COP29-a ev sahibliyi etməsinə də diqqət çəkərək bunun ölkənin iqlim fəaliyyətinə mühüm töhfə olduğunu qeyd edib.

Yunanıstanın Trakya Demokrit Universitetinin professoru Marika Karagianni isə ilk olaraq Azərbaycana səfərlərindən bəhs edib və bu səfərlərin hər birində fərqli vəzifələri icra etdiyini vurğulayıb.

Natiq diqqətə çatdırıb ki, 2000-ci illərin əvvəllərindən etibarən Azərbaycan Yunanıstan və bir çox ölkənin, Cənub-Şərqi Avropa və bütövlükdə Avropanın enerji, iqtisadiyyat və siyasət baxımından güclü, etibarlı və ciddi bir tərəfdaşı olub.

Marika Karagianni Azərbaycanın Avropanın çox sabit bir qaz təchizatçısı olduğunu deyib.