Ankaradakı “ATO Congresium” sərgi mərkəzində Azərbaycanın da geniş təmsil olunduğu “Beynəlxalq İslam Sənətləri” sərgisi öz işini davam etdirir.

“EDnews ” xəbər verir ki,200-dən çox yerli və beynəlxalq rəssam və alimlə yanaşı, çox sayda təşkilatın da iştirak etdiyi sərgi çərçivəsində ziyarətçilərə keçmiş ilə gələcəyi birləşdirən unikal mədəniyyətə səyahət imkanı yaradılıb.

“Beynəlxalq İslam Sənətləri” sərgisində Türkiyədəki səfirliyimizin nəzdindəki Azərbaycan Mədəniyyət Mərkəzi stendlə təmsil olunur.

Sərgidə Azərbaycan Rəssamlar İttifaqının üzvü, xalçaçı Elnarə Rəsulovanın, rəssam-dizayner Pərvanə Əliyevanın, xalçaçılıq üzrə mütəxəssis Ruhiyyə Süleymanovanın və ağac üzərində oyma mütəxəssisi Şahin Rəsulovun əl işləri, xalçalar, milli geyimdə kuklalar, suvenirlər və milli mədəniyyətimizə məxsus ağac oyma üsulu ilə hazırlanmış əsərlər nümayiş etdirilir.

Azərbaycan stendini Türkiyə Prezidenti Rəcəb Tayyib Ərdoğanın xanımı Əminə Ərdoğan ziyarət edib.

Onu da qeyd edək ki, tədbirdə dekorativ tətbiqi və təsviri sənət nümunələrinin nümayişi, rəqəmsal instalyasiyalar, praktik seminarlar, konfranslar, panel müzakirələri, ustad dərsləri və konsert proqramları da nəzərdə tutulub.

Mayın 11-dək davam edən tədbirdə 15 Azərbaycan xalçası da təqdim edilib. Sərgi çərçivəsində Elnarə Rəsulovanın müəllifi olduğu xalçalar təqdim edilib.

Fatimə Mərdanlı //EDnews