Son zamanlar Azərbaycanda qrip virusu yayılmaqdadır. Artan xəstəlik cəmiyyət içində qorxu və təşviş yaradıb. 3 ilə yaxındır davam edən koronavirusun adını unutduğumuz dövrdə yenidən gündəmə gələ bilərmi? İnsanlar arasında kütləvi yoluxmaların artma ehtimalı nə qədərdir?
Son sutkada isə ölkədə COVID-19 əleyhinə vaksin vurulmayıb. 16 yeni yoluxma faktı qeydə alınıb, 93 nəfər müalicə olunaraq sağalıb, ölən yoxdur.
Həkim Məlahət Hümmətqızı Ednews-a məsələ ilə bağlı danışarkən qeyd edib ki, bu barədə əvvəlcədən proqnoz vermək çətindi.
“Əhali arasında qrip virusu kəskin yayılıb. Virus havada hələ də var. Qışda havaların necə keçəcəyini hələ bilmirik. Sərtmi olacaq, küləkli, yağışlı, qarlı olacaq, bəlli deyil. Viruslar hava, damcı yolu ilə yayılır. Virusun yayılmasında havanın çox böyük rolu var. Soyuq havalarda maska taxmağın tərəfdarıyam. Özüm taxıram. Yenidən virusa yoluxmamaq üçün, soyuq, yağışlı havalarda maska taxmalıyıq”.
M.Hümmətqızı söhbət əsnasında Azərbaycanda hələ də Covid-19 diaqnozlu xəstələrin olduğunu da qeyd edib.
“Evdə yatan xəstələr arasında Covid-19 diaqnozu aşkar olsa da, əvvəlki kimi ölüm halları yoxdur. Xəstələr tez bir zamanda sağalıb ayağa qalxırlar. Buna səbəb Respublikamızda əhali arasında aparılan kütləvi vaksinasiyalar, virusun mutasiyaya uğraması və insanlarda immun vəziyyətin güclənməsidir”.
Tibb elmləri doktoru, professor Adil Qeybulla açıqlamasında bildirib ki, koronavirus pandemiyası hələ bitməyib:
"Karantin də təbii ki, davam edir. Sadəcə karantin qaydaları çox yumşaldığından biz o qədər hiss etmirik. Lakin pandemiya hələ davam edir. Pandemiyanın bu il bitməsi proqnozlaşdırılır, çünki o, artıq öz qürubuna, finişə doğru gedir. Bu il çox güman ki, bitəcək".
A.Qeybulla son günlərdə yayılan virusdan da danışıb:
"Hazırda influenza – qripin mutasiya forması yayılıb. Bu, Avropa ölkələrində də yayqındır. Qrip hər il mutasiyaya uğrayaraq yeni formada peyda olur. Onun A, B və C forması var. Ən çox yayılan forması A-dır. Qripin 2000-dən çox mutasiya ştamı var. Qrip vaksinləri də hər il yenidən hazırlanır. Doğrudur, bu peyvəndlər məsələnin tam həlli deyil, amma immunitetin yaranmasında xeyli rolu var. Bu baxımdan da vaksinasiya məsləhətdir. İnfluenza virusu bəzən yuxarı tənəffüs yollarının katarı ilə - asqırma, öskürmə, burnun tutulması və s. formada, bəzən isə yüksək temperatur, bel, əzələ ağrıları kimi əlamətlərlə özünü göstərir. Hazırkı virus xeyli arealı əhatə edir. Amma nəzərə almaq lazımdır ki, qripin təhlükəli forması gözlənilir. Bu, "ispan qripi" (100 milyona qədər insanın ölümünə səbəb olub) şəklində özünü göstərəcək. Bu barədə Ümumdünya Səhiyyə Təşkilatı xəbərdarlıq edib".
Xatırladaq ki, koronavirus 2019-cu ilin dekabrında Çinin Uhan şəhərində yayılmağa başlayıb. Çin həmin ilin sonunda Ümumdünya Səhiyyə Təşkilatını (ÜST) ölkədə naməlum virusun yayılması barədə məlumatlandırıb. ÜST 2020-ci il fevralın 11-də infeksiyanın adını COVID-19 qoyub, 1 ay sonra - martın 11-də isə koronavirusun yayılmasını pandemiya elan edib.
Oğuz Ayvaz
