“İnsanların demək olar hamısı boğaz ağrısı ilə qarşılaşır. Boğaz ağrısının müxtəlif səbəbləri ola bilər. Tonzillit (damaq badamcıqlarının iltihabı), faringit, reflüks, udulmuş yad cisimlər, boğazda əmələ gələn törəmələr,uzun müddət siqaret çəkmək, allergiya və.s səbəblər boğazda problemlər yaradır”.
Bu fikirləri Ednews-a açıqlamasında otorinolarinqoloq, həkim Möhübbət İsmayılov bildirdi. Onun sözlərinə görə, soyuq havaların bitməsi ilə insanlar boğaz ağrılarından qurtulduqlarını düşünürlər. Lakin yay aylarında da boğaz ağrıları ilə kifayət qədər qarşılaşırıq:
“Yay aylarında boğaz ağrılarının əsas səbəblərindən biri sərinləmək üçün istifadə edilən çox soyuq (buzlu) içkilərdir. Bu zaman bədən temperaturunda ani düşmə, yuxarı tənəffüs yollarına gələn damarların daralmasına və boğaz infeksiyalarına, bundan başqa hovuzlardan daha çox istifadə olunması insanların bakteriyal infeksiya ilə yoluxmasına səbəb olur”.
Həkim həmçinin onu da qeyd etdi ki, havaların isti keçməsi ilə əlaqədar, bir çox insan vaxtını evdən kənarda keçirtməyə üstünlük verir ki, bu da insanlar arasında olan sıxlığı artırır. Belə olan halda bakteriya və viruslarla insanların yoluxma ehtimalı da artır.
“Yayda evlərdə istifadə olunan kondisonerlər boğaz ağrılarına səbəb ola bilər. Mümkün olduğu qədər evin havasın təmiz saxlamaq və kondisonerdən çox sıx istifadə etməmək məsləhətdir”.
M.İsmayılov vurğuladı ki, boğaz ağrısı bütün yaş qruplarında rast gəlinir, lakin uşaqlarda bu faiz daha çoxdur:
“Boğaz ağrısından qorunmaq üçün bu qayadlara əməl etmək məsləhətdir:
- Gigiyena qaydalarına əməl edin,
- Xəstə insanlardan uzaq durun,
- Uzun müddətli soyuq (buzlu) qidalar və ya içkilər tükətməyin, uşaqlarınız dondurma yedikdən sonra ilıq su içirdə bilərsiniz,
- Geyiminizi havaya uyğun edin,
- Tərlədikdən sonra paltarlarınızı dəyişin,
- Sudan çıxdıqdan sonra saçlarınızı qurulayın,
- Kondisonerdən az istifadə edin və istifadə edən zaman otaq havasını nəmli edin”.
Aynurə İsmayıl