Məhərrəm ayının 10-cu günü Aşura mərasimi ilə əlaqədar Azərbaycanda qanvermə aksiyaları keçirilir. Hər il minlərlə insan könüllü qan verir. Əksər insanlar sağlamlıqları qaydasında olduqda qan verə bilər. Qan donoru olmaq üçün yerinə yetirilməli olan bəzi əsas tələblər var.
Ednews-a danışan ilk tibbi yardım mütəxxəsisi İzzət Məmmədov bildirdi ki, qan vermək üçün yaşı 18-dən yuxarı sağlam insanlar olmalıdır.
"Qan verən insanın çəkisi 50-52 kq-dan aşağı olmamalıdır. Qan verən gün insanın bədən hərarəti 37 dərəcədən yuxarı, 35 dərəcədən aşağı olmamalı, minimal çəki göstəricisi isə 50 kq olmalıdır".
İ.Məmmədov qeyd etdi ki, bəzi hallar qan verməyə mane ola bilər.
"Soyuqdəymə, qrip, boğaz ağrısı, soyuqdəymə, mədə iltihabı və ya hər hansı digər infeksiya varsa, qan vermək olmaz. Əgər bu yaxınlarda döymə və ya bədən pirsinq etdirmisinizsə, əməliyyat tarixindən etibarən 6 ay ərzində qan vermək mümkün deyildir. İstifadə etməkdə olduğunuz dərmanlar varsa mütləq qan verdiyiniz mərkəzdəki həkimə bildirin. İnfarkt keçirən bir adam qan verə bilməz”.
Mütəxxəsis həmçinin vurğuladı ki, qan ianəsi zamanı yüngül baş dönməsi normal olan bir şeydir. Qan ianəsinin əks göstərişləri ən çox gənclər arasında təsirlidir.
"Görülən yan təsirləri bunlardır;
Tərləmə və titrəmə, özündən getmə və yıxılma, oynaqlarda sərtləşmə, stress, mədə bulanması, dodaq və burunda uyuşma".
Aynurə İsmayıl