Azərbaycanın müxtəlif bölgələrində qızılca və onun kimi bir sıra infeksion xəstəliklər yayılıb. Ölkə ərazisində kifayət qədər tibbi müəssisə mövcud olsa da, xəstəlidən əziyyət çəkən insanların bu yerlərə baş vurma dərəcəsi olduqca aşağıdır.
Ölkədə infeksion xəstəliklərin bu dərəcədə yayılmasının səbəbi nədir?
Mövzu ilə bağlı Ednews-a danışan İnfeksionist-hepatoloq dr. Mərdan Əliyev azyaşlılar arasında qızılca xəstəliyinin yayılmasının səbəbini onların peyvəndə cəlb edilməməsi ilə əlaqələndirib:
“Hazırda uşaqlar arasında yayılan qızılca xəstəliyi əslində hər il baş qaldırır. Buna baxmayaraq, bu il qızılca xəstəliyinin yayılması çox qeyri-formadadır. Buna səbəb isə peyvəndlərin lazımi qaydada vurulmamasıdır. İnsanlar infeksion xəstəliklərdən yayınmaq üçün müxtəlif vaxtlarda peyvənd olunmalıdır. Qızılca xəstəliyinə yoluxmaların bu tipli artımları Ümumdünya Səhiyyə Təşkilatı (ÜST) tərəfindən proqnozlaşdırılıb. Hazırda Avropada da yoluxma sayı kəskin artıb. Burada əsas yoluxanlar peyvəndlənmə yaş dövrünün COVID-19 pandemiyasına təsadüf edən uşaqlardır. Çünki qızılca vaksinasiya ilə tam qarşısı alına biləcək xəstəlikdir. Təəssüf ki, valideynlər bu barədə məsuliyyətsiz davranaraq övladlarını peyvənddən yayındırırlar. Peyvəndlərə biganə yanaşılması bu qədər çox sayda azyaşlının qızılca və qrip kimi xəstəliklərdən əziyyət çəkməsinə şərait yaradır. Əlavə olaraq rayonlarımızda vəziyyət daha ağırdır – bəzi tibbi müəssisələrdə ümumiyyətlə heç bir peyvənd olunma əməliyyatları aparılmır və təhsil ocaqlarında bununla bağlı informativ xarakterli tədbirlər keçirilmir”.
Qızılcaya yoluxmanın qarşısını almaq üçün insanların məsələni daha ciddi qəbul etməsi kifayətdir:
“Pandemiyadan sonra zaman keçdikcə insan orqanizmində formalaşan xəstəliklər fəsil dəyişikliyi zamanı daha da aktivləşir. Məktəb və universitet kimi ümumi təhsil müəssisələrində insanların gigiyenik formada təhsil almasını təmin etmək hər bir müəssisənin prioritetlərindən biri olmalıdır”.
Mütəxəssis həmçinin qeyd edib ki, qızılcanın xüsusi müalicəsi yoxdur. Onun sözlərinə görə təmiz və izolyasi edilmiş ev şəraitində bu mümkündür.
Lakin…
“ Əhaliyə xəbərdarlıq etmək lazımdır ki, bu xəstəlik insanların bədənində fərqli reaksiyalara səbəb ola bilir. Buna görə də, həkimlə məsləhətləşmək lazımdır. Bu xəstələr çox zaman ailə sağlamlıq mərkəzlərinin həkimləri tərəfindən nəzarətə götürülür. Bir sıra hallarda yoluxmuş şəxslərdə xəstəliyin ağırlaşma halları baş verə bilər. Bunlara pnevmoniya, orta qulağın iltihabı, bağırsaq mənşəli ağırlaşmalar, ensefalit, meningit və s. aiddir”.
Fərid Axund
