Kəşfiyyat müharibələrinə damğa vuran xanım kəşfiyyatçılar da olub. Belə xanımlar adətən jurnalist, həkim və diplomat peşəsinin daşıyıcıları olub.
Nataliya Sergeyeva da belə kəşfiyyatçı xanımlardan biri olub.
Eurasia Diary bu məşhur, amma barəsində geniş informasiya olmayan casusun dosyesini təqdim edir:
Nataliya Serqeyeva 1912-ci ildə Sankt-Peterburqda doğulub. General-leytenant Yevgeniya Millerin yaxın qohumu olub. Ancaq Oktyabr İnqilabından sonra ailəsi Rusiyanı tərk edərək Fransaya köçüb. Nataliya Parisdə təhsil alıb. Fransız, ingilis və alman dillərini mükəmməl öyrənib. Daha sonra jurnalist kimi fəaliyyətə başlayıb. Hətta Faşist Almaniyasının ciddi fiqurlarından olan Qerman Qerinqdən müsahibə alıb.
Az sonra Hitler II Dünya Müharibəsini başladıb. Bu müharibə zamanı almanlar Fransanın müəyyən hissəsini işğal edib. Nataliyanın yaşadığı ərazilər də alman işğalına məruz qalıb.
Qısa müddətdən sonra almanlar jurnalistə hərbi kəşfiyyat və əks-kəşfiyyat qurumuna (Abver) işləməyi təklif edir. Nataliya bu strukturun casusu kimi işləməyə razılıq verir. Onu 1943-cü ildə İspaniyaya göndərirlər. Alman kəşfiyyatının əsas məqsədi Nataliyanın bir müddət İspaniyada qalması, daha sonra Böyük Britaniyaya keçərək casusluq fəaliyyətinə başlaması idi.
İspaniyadan Böyük Britaniyaya keçmək üçün Madriddə İngiltərə konsulluğuna daxil olan Nataliya Alman hərbi kəşfiyyatının casusu olduğunu, onun qarşısında qoyulan vəzifələr haqqında məlumat verir və bildirir ki, bu müharibədə Hitlerin məğlub olması naminə İngiltərənin xeyrinə ikili casus kimi işləməyə hazırdır.
Beləcə Nataliya Böyük Britaniyanın əks-kəşfiyyat xidməti olan Mİ5 üçün işləməyə başlayır. Onun İngiltərədən yeganə xahişi xəstələnən itinə xüsusi qayğı göstərilməsi olur.
Britaniya nümayəndələri Nataliyanın təklifini qəbul edirlər, habelə onun iti haqqında xahiş və şərtlərini yerinə yetirəcəklərini bildirirlər.
Bununla da “Lili” ləqəbli Nataliyanın Abverə dezinformasiya xarakterli informasiyalar göndərməsinin əsası qoyulur.
Britaniya əks-kəşfiyyat xidmətinə “Xəzinə” kod adı ilə işləyən jurnalist Londonun maraqlarında olan dezinformasiyaları Alman kəşfiyyatına göndərirdi. Bu məlumatlar digər alman “casuslarının” göndərdiyi məlumatlarla əksər vaxtlarda eyniyyət təşkil edir və Berlində inandırıcı informasiya kimi qəbul olunurdu.
Ancaq ingilislər itə görə qəbul etdikləri şərtləri qoruya bilmədi, “Xəzinə”nin iti xəstələnir və vəfat edir.
İtinin ölüm xəbəri Nataliyaya çox pis təsir edir, o uzun müddət özünə gələ bilmir, bəzən özündə olmurdu. Depresiya yaşayan casus bir dəfə ağzından qaçırır ki, Alman kəşfiyyatına informasiyanı məxfi kod vasitəsilə göndərəcək. Bu kod haqqında İngiltərə kəşfiyyatının heç bir məlumatı yox idi.
Bu səbəbdən İngilis kəşfiyyatı “Xəzinə”ni radioqramadan kənarlaşdırdı, onun fəaliyyətinə nəzarətlə icazə verdilər. Ancaq o, verdiyi məxfi kod vasitəsilə Mİ5 almanlara informasiya ötürməkdə davam edirdi.
1944-cü ilin sonunda Nataliya Fransaya qayıdır. Daha sonra Amerikaya gedir. Bir müddət ABŞ-da yaşayan jurnalist və ikili agent1950-ci ildə böyrək xəstəliyi səbəbindən dünyasını dəyişir.
Jurnalist fransız dilində “Tək Abvera qarşı” adlı memuarını yazmağa müvəffəq olub. Bu memuar 1968-ci ildə ingilis dilinə tərcümə olunub və Londonda təqdimat mərasimi keçirilib.
Jurnalist həmçinin Avropanı piyada gəzdikdən sonra “Mənim səyahətim” adlı kitabını hazırlayıb. Bu kitabı 1946-cı ildə nəşr olunub.
Nataliya Mİ5 üçün fəaliyyəti dövründə ən ciddi və strateji hesab olunan “Fortitude” (Möhkəmlik) əməliyyatının əsas beyin mərkəzlərindən olub. Bu əməliyyat Normandiyaya müttəfiq qoşunlarının çıxarılması ərəfəsində Hitler kəşfiyyatına dezinformasiya xarakterli məlumatlar ötürməklə onlara gözləmədiyi yerdən zərbə endirməyi və qoşunları maneəsiz Normandiyaya çıxarmağı nəzərdə tuturdu.