Qatarla səyahət etmək Türkiyəni kəşf etməyin ən yaxşı yollarından biridir.
Ednews xəbər verir ki, son illərdə tarixi qatarlarla yanaşı sürət qatarları da olduqca populyarlaşıb.
Qeyd edək ki, Anadolunun dağ yamaclarının və təbii gözəlliklərinin üzə çıxarılmasında qatar səyahəti mühüm rol oynayır.
Bəs niyə səyahəti qatarla etməyi seçməliyik:
Qatarla səyahət şəhərləri, dağları və çayları oturduğunuz yerdən eyni vaxtda görməyə imkan verir. Bu səyahət növünün təyyarə və avtomobil səyahətindən digər üstünlüyü ondan ibarətdir ki, uzun səfər dərindən düşünməyinizi, meditasiya etməyinizi və oxumaqdan zövq almağınızı təmin edir.
Eyni zamanda səyahətin bu növü yeni şeyləri daha ucuz qiymətə kəşf etməyə vəsilə olur. Həmçinin, uçmaq, enmək və ya təhlükəsizlik kəməri taxmaq kimi problemləri də mövcud deyil.
Səyahət növünün digər avantajı isə mənzil başına daha tez çatmağa kömək etməsidir. Belə ki, qatar sizi şəhərin mərkəzinə apardığı üçün ondan düşəndən sonra mərkəzə nəqliyyat vasitəsi tapmaq çətin olmur.
Eyni zamanda qatar səyahəti yeni tanışlıqlar və dostluqlar qurmaq üçün də əlverişli vasitədir.
Qeyd edək ki, son illərdə yeni sürətli dəmir yollarının genişləndirilməsi və ucqar yerlərə də səyahətlərin təşkil edilməsi nəzərdə tutulur.
