İnsanların heyvan sığallama adəti bədənin avtomatik rahatlamasına səbəb olur. Alimlər müşahidə ediblər ki, heyvan sığallamaq əhval ruhiyyəni yaxşılaşdıran bir sıra hormonları, o cümlədən xoşbəxtlik hormonu olan serotonin, süd hormonu olan prolaktin və sevgi hormonu hesab edilən oksitosinin ifraz edilməsinə səbəb olur.
Ednews marcolibrarsi.it-ə istinadən bu barədə araşdırmanı təqdim edir:
“Pet terapiya”nın faydaları
Heyvanla aktiv şəkildə vaxt keçirmək fiziki və mental dəyişikliklərə səbəb olur. Bunu son illərdə araşdırma aparan alimlər və pasiyentlərinə “pet terapiya” tətbiq edən bir çox sağlamlıq mərkəzləri deyir. Araşdırmalar göstərir ki, “pet terapiya” ilə məşğul olan pasiyentlər digər pasiyentlərə nisbətən daha az dərman istifadə edirlər.
Demensiya və altsheymer xəstəliyinə təsiri
Sözügedən xəstəliklərdən əziyyət çəkən və hər həftə 1.5 saat it və ya atla vaxt keçirən xəstələrdə narahatlıq, yuxusuzluq və müvazinəti itirmə kimi hallar xeyli azalır. Heyvanlarla təmas onlarda yaddaşı yaxşılaşdırır və diqqəti artırır.
Ürək-damar sistemi xəstəliyinə təsiri
2007-ci ildə "American Journal of Critical Care"də yayımlanan bir araşdırmaya görə itlə 12 dəqiqəlik gəzinti qan təzyiqini yaxşılaşdırır, adrenalin və noradrenalin səviyyəsini azaldır və kəskin ürək çatışmazlığı olan xəstələrdə narahatlığı aradan qaldırır.
Yaşlılara təsiri
“Pet terapiya” öz müalicəvi təsirini yaşlılara həm fiziki, həm psixoloji cəhətdən göstərir. Tənhalıq hissini aradan qaldırır və əhval-ruhiyyəni yaxşılaşdırır. Heyvan sahibi olmaq yaşlıları evdən çölə çıxaraq hərəkətdə olmağa təşviq edir.
Uşağın inkişafındakı rolu
Araşdırmalara görə, heyvanla böyüyən uşaqlarda digər uşaqlara nisbətən allergiya halları daha az olur. Digər tərəfdən, heyvanla təmas uşaqlarda diqqəti artırır, inkişafı sürətləndirir, hiss və duyğuların daha yaxşı ifadə edilməsinə kömək edir.
Bəs “pet terapiya”da istifadə olunan heyvanlar hansılardır?
İt, at, delfin, uzunqulaq və pişik “pet terapiya” üçün ən çox müraciət edilən heyvanlardır. Amma balıq, quş, dovşan, tısbağa, keçi, inək kimi heyvanların da insanlara müsbət təsirini unutmaq olmaz.
Mehri Ağayeva
