Ölkəmizdə narkomaniya qorxulu yuxuya çevrilib. İndi cavan, yaşlı oğlan və qızlar həyatlarını qara buluda çevirirlər. "Bir dəfə ilə heçnə olmaz” deyə-deyə bu iyrənc  həyatın qurbanı olurlar. Bundan sonra onlar bir amalla yaşayırlar - Narkotik maddəni qəbul edib, ağrılardan qurtulmaq.

Bu günki qəhrəmanımızın da həyatını uyuşdurucu maddələr qaraldıb. Həmsöhbətimiz 16 yaşdan narkotik qəbul edən, 21 yaşlı qəhrəmanımız bildirir ki, ay yarım müalicə aldıqdan sonra ölümcül aludəçilikdən qurtulub. Adının çəkilməsini  istəməyən gənclə söhbətimiz belə başladı....

-İlk necə başladın uyuşdurucu qəbul etməyə? Bu qaranlıq həyat səni özünə necə cəzb elədi? 

- Dostumla birgə rayondan gəlirdik. Yolun yarısına çatanda o, maşını yolun kənarında saxlayıb, falqada nəsə çəkməyə başladı. Yanında olduğum üçün tüstüsü mənə də dəyirdi. Hiss etdim ki, əhvalım başqa olur. Soruşdum özündən ki, nə idi çəkdiyin, mənə tamamən başqa cür təsir edir. Çünki özümə də xoş idi. Cavabında “mənə baxma, bu sənlik bir şey deyil,- dedi. Mən də necə yəni yanımda çəkdiyin nədirsə bilməliyəm deyə cavab verdim. Dostum dedi ki, bu narkotik deyil, ancaq insanın əhvalını yaxşı etmək üçündür. Sən demə patı imiş maddənin adı. Elə oldu ki, dostumdan alıb çəkməyə başladım. 

-Necə yəni yaxşılaşdırır? Yuxunuz gəlir yoxsa necə?

-Yox insana güc gəlir. Daima işləmək istəyirsən. Heç yorulmaq bilmirsən.İlk vaxtlar dostumdan alırdım. Sonra günə 10-20 bəzən 50 manat verirdim ikimiz də alırdıq çəkirdik. Artıq bir neçə müddət keçdi və iyrənməyə başladım. Həm də təsir etmirdi. Kakos-a keçdim. Bilmirdim fəsadlarını amma məcbur idim çəkməyə. Çünki bədən tələb edirdi.

-Bunu almaq üçün pul lazım idi. Pulu necə əldə etdirdin belə kiçik yaşlarında?

-Pulu ya evdən ya da qohum tanışdan. Elə bir şeydir ki, düşmənə yalvarırsan ki, 5-10 manat pul ver, qaytaracam. Pul da tapa bilməyəndə də məcbur olub lombarda telefonumu, saatımı nəyim varsa qoyub pul edirdim. Fikrində o olur ki, hardan olsa da alıb ağrılardan qurtulasan.

-Necə ağrılar? Özünü həmin vaxt necə hiss edirdin? 

-Artıq bir gün çəkməyəndə sümüklərin sızıldayır, qarın ağrısı, ürəkbulanma, üşütmə, bədəninin ağrısından ölürsən. Bilmirsən necə sakitləşəsən. Yalnız bir yolu olur. O da maddə qəbul etmək. Elə hiss edirsən ki, əllərini ayaqlarını kimsə daşla, dəmirlə döyür. Sümüklərin o dərəcə sızıldayır. Yay olanda hər kəs qoluaçıq geyimdə olanda sən nə qədər geyinsən də üşüyürsən.

- Qiyməti necə? Həqiqətən ucuzdurmu?

-İndi qiymətlər həqiqətən ucuzdur. Əvvəl patı 60-70 manat olurdu. İndi hamısının qiyməti düşüb. Əsas da patının. Çünki üstünlük patıdadır. Patının qramı indi 20 manata, kakosun qramı 40 manatadır. Qramını da istifadə edəndən asılı olaraq dəyişir. Elə adam var bir günə bəs edir, eləsi var 3-4 gün.  

- Bəs sonra nə oldu? Necə oldu ki, narkoloji dispanserə getdin, müalicə aldın?

-Yaşadığım ərazinin əməliyyat qurupu xəbər tutdu ki, pis hallara düşürəm. Özləri görmüşdü. Məni narkoloji dispanserə göndərdilər. 21 gün müalicə aldım. Evə gəldikdə yenə çəkmək istəyirdim yəni tam qurtarmamışdım. Çünki xəstəxanada ancaq insanı keyidirlər. Bu sənin çıxdıqdan sonra yalnız iradəndən asılıdır. 

-O iradə necə oldu səndə? Çünki hər insan bunu bacarmır.

-Öncə müəyyən dərmanlar var ki, onları 25 gün qəbul etməlisən. Ancaq o müddət heç bir maddə qəbul edilməməlidir. Sonra isə özüm özümdən də utanırdım. Söz vermişdim ki, mən bitirəcəm bu maddələrlə və belə də oldu. Hazırda tam sağlamam. Şükür Allaha heç nə qəbul etmirəm. 

-Həqiqətən halal olsun. Çünki insanlar müalicə alsalar da bununla sonadək müqavimət göstərə bilmirlər. Son olaraq nə demək istəyirsiz? 

-Bu dərin bir bataqlıqdır. İnsan düşdüsə çıxa bilmir. İtər cavan, istər yaşlı. Normal həyat yaşaya bilmirsən, hər kəsin üz qarası olursan. Qohum, qardaş, ailə... Sözüm əsas da cavanlaradır. Onu demək istəyirəm ki, həyatlarını məhv etməsinlər. Anlıq yaranan xoşbəxtlik hisləri onları aldadır. Mən 16 yaşımdan 20 yaşlarıma qədər həyatımı məhv etmişəm. Siz etməyin.

Bəli, o, həyatının 4 ilini ağ vərəqə mürəkkəbi axmış və səliqəsiz hərflərlə yazılan yazılarla doldurdu. Amma siz həyatınızı sadəcə səliqəli yazılarla yazılmış ağ vərəqdə təsvir edin. 

Ləman Abbaslı

Foto: Fariz Faiqoğlu