Mixail Yevdokimov Rusiyanın Azərbaycandakı səfiri təyin edildi.
Rusiya prezidenti Vladimir Putin bununla bağlı müvafiq fərman imzalayıb. Digər sərəncamla Mixail Boçarnikov tutduğu vəzifədən azad edilib.
Lakin səfir təyinatı bir qədər vaxt apardı. Rusiyanın Azərbaycandakı səfirinin bu qədər gec təyin olunmasının səbəbləri nə ola bilərdi?
Milli Enerji Təhlükəsizliyi Fondunun eksperti və Rusiya hökuməti yanında Maliyyə Universitetinin tədqiqatçısı Stanislav Mitraxoviç Ednews-a bildirib ki, bir tərəfdən təyinatla bağlı müəyyən gecikmələr olub, lakin bu o demək deyil ki, kimsə onların heç göndərilməyəcəyini gözləyirdi:
“Bütün məsələləri, o cümlədən səfir təyinatı kimi mühüm məsələni razılaşdırmaq üçün əlavə vaxt tələb edən bir diplomatiya var, amma görünür, bu vaxt lazım idi. Ümumiyyətlə, mən Azərbaycanla münasibətləri müsbət istiqamətdə inkişaf etmiş kimi qiymətləndirirəm. Rusiya-Azərbaycan arasında bir çox ümumi maraq sahələri var”.
Onun sözlərinə görə, Azərbaycanın əsas ticarət tərəfdaşlarından biri olan Rusiyanın ticarət əlaqələri davam etməkdə və artmaqdadı və bir sıra əmtəə qrupları üçün müxtəlifliklər də mövcuddur:
“Mən daha çox enerji məsələləri, o cümlədən qaz mübadiləsi məsələləri ilə məşğul oluram. Azərbaycan Avropaya ixrac üçün daha çox qaz tədarükü həyata keçirə bilir, amma əslində iqtisadiyyatın digər sektorları da işlək vəziyyətdədir, ona görə də çoxlu müsbət nümunələr saymaq olar”.
“Aydındır ki, Rusiya və Azərbaycanın Qarabağ məsələsində mövqeyi tam eyni deyil. Xəzərlə bağlı və bəzi məsələlərlə bağlı anlaşılmazlıqlar var. Amma məncə, bunların hamısının kifayət qədər öhdəsindən gəlmək olar və müsbət proseslərin sayı mənfi olanlardan qat-qat çoxdur. Ona görə də sonda səfir təyinatı baş verdi və əminəm ki, müsbət olanlar üstünlük təşkil edəcək. Gələcəkdə mübahisəli olan məsələ yenidən diplomatik, ilk növbədə, mexanizmlərlə həll olunacaq”.
Ülviyyə Şahin
