İsraildə bank işçiləri də Baş nazir Benyamin Netanyahunun məhkəmə sistemi ilə bağlı islahatlarına qarşı tətilə qoşulmaq çağırışı edib.
Bəs bu sözügedən tətilin İsrail iqtisadiyyatına hansı təsirləri ola bilər?
İsrailli jurnalist və publisist, İsrail Jurnalistlər Birliyinin beynəlxalq əlaqələr komissiyasının rəhbəri Rostislav Qoltsman Ednews-a açıqlamasında ilin əvvəlində kütləvi etirazların yaratdığı çaxnaşmanın bir çox iş adamlarına təsir etdiyini deyib:
“Əsas odur ki, iri investorlar iqtisadiyyatımıza investisiya qoymağa tələsməməyə qərar veriblər. Hökumət mərkəzi bankın faiz dərəcəsini artırmaq da daxil olmaqla tədbirlər görməyə məcbur oldu. Bu tədbirlər, eləcə də xaricdən idxal olunan malların vergi və rüsumlarının azaldılması qısa zamanda öz nəticəsini verdi.”
Onun sözlərinə görə, inflyasiyanı, eləcə də İsrail iqtisadiyyatının köhnə bəlasını - daşınmaz əmlak qiymətlərini cilovlamaq mümkün olub:
“Mənzil qiymətləri nəinki sabitləşdi, hətta ucuzlaşmağa başladı. Belə ki, bir günlük bank tətilinin ölkədəki iqtisadi vəziyyətə ciddi təsir göstərməsi ehtimalı azdır.”
Ülviyyə Şahin