Ednews İkinci Qarabağ döyüşçüsü Toğrul Gülməmmədovla müsahibəni təqdim edir:

- Toğrul, özün haqda məlumat verərsən...

- 1995-ci ildə Bakıda anadan olmuşam. Orta-ixtisas təhsilimi Bakı Neft-Energetika kollecində almışam. 2013-2015-ci illərdə hərbi xidmətdə olmuşam.

- Zəfərimizi bizə yaşadan sizlər oldunuz, qalib ordunun qalib əsgəri olmaq necə bir hissdir?

- Əvvəlcə, qeyd etmək istərdim ki, Azərbaycan ordusunun əsgəri olduğum üçün fəxr edirəm və bu qürurlu qalibiyyət hissini yaşamağımıza imkan yaradan Ali Baş Komandan İlham Əliyevə təşəkkür edirəm. Bu elə bir duyğudur ki, onu heç bir kəlmə ilə ifadə etmək mümkün deyil. Orduda xidmət etdiyim üçün və torpaqlarımızın geri alınmasında mənimdə rolum olduğu üçün qürur hissi duyuram. Amma gəlin unutmayaq ki, biz bu qələbəni şəhidlərimizin sayəsində qazandıq. Onların qanı yerdə qalmadı. Allah onlara rəhmət eləsin. Allah ordumuzun bütün əsgərlərini qorusun.

- Torpaqlarımızı işğaldan azad etmək üçün sürətli əks hücum əməliyyatlarına başladığımız xəbərini alanda nə hisslər keçirtdiniz?

- Bu əslində bizim uzun zamandır gözlədiyimiz təlimat idi. Bu xəbəri alanda sanki qalibiyyət qazanacağımızı hiss edirmiş kimi bütün döyüşçülər kimi mən də çox sevindim. Hər şeydən əvvəl həyəcanda keçirtdim. Çünki hər döyüş özündə neçə-neçə igidlərin həyatına son qoyur. Anaların gözü yaşlı qalır. Heç kim istəməz bunu. Amma biz mübarizəmizdə haqlı idik. Bunun nə vaxtsa olacağı məlum idi. Ona görə də döyüşmək üçün hər an hazır idim.

- Döyüşlərə nə vaxt qatıldın?

- Mən döyüşlərə oktyabr ayının 15-i qatıldım. Bir həftəlik təlimlərdən sonra ön cəbhəyə yollandım.

- Vətən müharibəsində neçə gün iştirak etdin və hansı bölgələrdə döyüşdün?

- 15 gün ərzində Cəbrayıl və Qubadlının alınması uğrunda gedən döyüşlərdə iştirak etdim.

- Heç unuda bilmədiyin bir an oldumu?

- Müharibənin hər anı unudulmaz idi. Amma ən unudulmaz an elə qələbə qazandığımız barədə xəbər almağımız idi.

- Müharibədə olmaq səni qorxutmurdu?

- Təbii ki, hər bir insan kimi məni də qorxudurdu. Hər şeyi gözə alıb getmişdik döyüşə, arxada ailəmizi, sevdiklərimizi buraxaraq. Amma döyüş davam etdikcə qorxu hissi yoxa çıxırdı. Çünki qorxaraq bu qələbəni qazana bilməzdik.

- Döyüşlər sənin üçün nə ilə yadda qaldı?

- Döyüş mənim üçün yoldaşlarımın əzmkarlığı, millətimin vətənpərvərliyi ilə yadda qaldı.

- Ordumuz, əsgərlərimiz ən çox nədən ruh alırdılar?

- Əsgərlər millətimizin xeyir-dualarından ruh alırdılar. Amma hər şeydən öncə 30 illik həsrətə son qoymaq arzusu ilə döyüşürdük. Bu da bizə əlavə bir ruh verirdi.

- Ermənilərin hiyləgərlikləri ilə qarşılaşdınız?

- Xeyir, elə bir hiyləgərliklə qarşılaşmadıq. Çünki biz ayıq komandirlərimiz sayəsində çox gözəl yerdə mövqe tutmuşduq. Elə bir halla qarşılaşsaydıq belə, lazımı cavabı verəcəkdik.

- Yenidən səfərbərlik elan olunarsa döyüşlərdə iştirak edərsən?

- Ümid edirəm ki, hər şey sülh yolu ilə həll olunar. Amma səfərbərlik elan olunarsa, yenə həmin istəklə, ruhla döyüşməyə hazıram. Tanrı Türkü qorusun!

- Son olaraq, EDNEWS oxucularına nə demək istərdin?

- Bizi unutmadığınız üçün mənəvi dəstəyinizi heç bir vaxt  əksik etmədiyiniz üçün hər birinizə təşəkkür edirəm və bildirmək istəyirəm ki, nə qədər ki, biz varıq, nə qədər ki, Azərbaycan oğlu sağdırsa, ayaq üstündədirsə, bir o qədər də qələbə bizimlə olacaq. Qarabağ Azərbaycandır!

Söhbətləşdi: Oğuz Ayvaz