Sentyabrın 27-də “Laçın” dövlət sərhədindən buraxılış məntəqəsində Dövlət Sərhəd Xidmətinin hərbi qulluqçuları ölkə ərazisinə qeyri-qanuni gələrək qondarma “Dağlıq Qarabağ Respublikasının Dövlət naziri” vəzifəsində çalışmış 1968-ci il təvəllüdlü Ruben Vardanyan Azərbaycan Respublikasından Ermənistan istiqamətində hərəkət edərkən saxlanılıb.

Ruben Vardanyan Dövlət Sərhəd Xidmətinin Çevik Hərəkət Qüvvələri əməkdaşlarının müşayiəti ilə Bakıya gətirilib. 

Ruben Vardanyan ilə bağlı hansı hüquqi proseslər baş verəcək və onu nə tale  gözləyir?

Məsələ ilə bağlı ANAMA yanında İctimai Şuranın sədr müavini, beynəlxalq hüquqşünas Emil Həsənov Ednews-a danışıb. O, qeyd edib ki, Ruben Vardanyan erməni əsilli olmasına baxmayaraq “de fakto” olaraq Azərbaycan qanunvericiliyi əsasında mühakimə olunacaq. 

“Əsas məsələ ondan ibarətdir ki, əvvəllər rus vətəndaşı olan Ruben 2022-ci ildə rus vətəndaşlığından imtina etdiyini bəyan edib. Lakin son məlumatlara əsasən Rubenin Ermənistan vətəndaşı olduğu müəyyən edilib.

Ümumiyyətlə ölkələr arasında   cinayətkarların təhvili haqqında ekstradisiya və ekstriditsiyalar var.

Lakin bəzi hallarda cinayət daha ağır olduqda ekstradisiya prosesinə şamil edilmir. Məsələn  ölkə ərazisində terror aktlara rəhbərlik, terror təşkilatlarını maliyələşdirmək, çirkli pulların yuyulması və s. bunlar həqiqətən ağır cinayətlərdir”.

“Əsas məsələ ondan ibarətdir ki, cinayət törədən şəxsin ərazisində olduğu dövlətdən ərazisində cinayətin törədildiyi dövlətə yaxud da cinayətkarın vətəndaşı olduğu dövlətə verilməsinin tənzimlənməsi üçün iki ölkə arasında sazişlər olur. Lakin Azərbaycan və Ermənistan arasında bu yoxdur və nəticədə hər hansısa bir dövlətin və ya təşkilatın iştirakçılıq cəhdləri ola bilər lakin bu arzu olunmazdır”.

Xəyal Ramiz