On ildən artıqdır ki, Azərbaycan öz milli kosmik sənayesini uğurla inkişaf etdirir, xidmətlərin ixracına diqqət yetirir. Oktyabrın 2-6-da Bakıda 74-cü Beynəlxalq Astronavtika Konqresinin keçirilməsi bu istiqamətdə mühüm addım oldu. Beynəlxalq Astronavtika Federasiyası (IAF) və “Azərkosmos”un təşkilatçılığı ilə keçirilən forumda dünyanın yüzdən çox ölkəsindən nümayəndə heyətləri iştirak edir və açılış mərasimi Azərbaycan prezidenti İlham Əliyevin iştirakı ilə baş tutub.

Keçirilən konqresin ölkəmiz üçün əhəmiyyəti və faydaları nədir?

“Bakı Konqres Mərkəzində 74-cü Beynəlxalq Astronavtika Konqresi öz işinə başlayıb. Ölkəmizin Beynəlxalq Astronavtika Konqresinə ev sahibliyi etməsi Azərbaycanın innovativ sənayedə apardığı islahatlara verilən beynəlxalq qiymət kimi də xarakterizə edilməlidir. Azərbaycan Prezidenti cənab İlham Əliyevin konqresin açılış mərasimində qeyd etdiyi kimi, 74-cü Beynəlxalq Astronavtika Konqresi Azərbaycanda kosmos sənayesinin və aparıcı texnologiyaların inkişafına töhfə verəcək”.

Bu fikirləri Ednews – a müsahibəsində deputat Vüqar Bayramov deyib. Onun fikirlərinə görə kosmik sənayenin inkişaf etdirilməsi Azərbaycanın kosmik ölkəyə çevrilməsi kontekstindən xüsusi qiymətləndirilməlidir.

“Sənayedə aparılan islahatlar ənənəvi sektorlarla yanaşı, innovativ sektorun inkişafını da stimullaşdırır. Kosmik sənayenin inkişaf etdirilməsi Azərbaycanın kosmik ölkəyə çevrilməsi kontekstindən xüsusi qiymətləndirilməlidir. Nəzərə alsaq ki, innovativ sahə olaraq kosmik sənayenin inkişafı həm bu istiqamətdə daha çox gəlirin əldə edilməsi, həm də Azərbaycanın innovativ potensialının təqdim olunması baxımından vacibdir. Bu, Azərbaycanın qeyri-neft sektorunda gəlirlərinə birbaşa təsir göstərən amillərdəndir. Xüsusən də, bu istiqamətdən daxilolmalar büdcə üçün çox əhəmiyyətlidir. Qeyri-neft sektorunun inkişafı hər bir sektorun ayrıca dəstəklənməsindən ibarətdir ki, bu kontekstdən də kosmik sənayenin inkişafı həm də dövlət gəlirlərinin artırılması baxımından vacibdir”.