Rusiya Prezidenti Vladimir Putin “Valday” Beynəlxalq Diskussiya Klubunun plenar iclasında çıxışı əsasəndə Ermənistanla bağlı açıqlamaları bir sıra sualları ortaya qoyub. Əsas fikir isə Putinin “Əgər Ermənistan özü Qarabağın müstəqilliyini tanımırdısa, niyə indiyə kimi Qarabağı tərk etmirdilər?” sualı olub.
Məsələ ilə bağlı Ednews-a danışan tanınmış erməni fəal və bloqer, İşxan Verdyan Ednews-a açıqlamasında bildirib ki, Ermənistanın 44 günlük müharibədə iştirakı Qarabağ münaqişəsinin ən böyük sirri olaraq qalır:
“Ermənistan mahiyyətcə Azərbaycan ərazisində döyüşür, Azərbaycan torpaqlarını Azərbaycan ordusundan qorumağa çalışırdı. Zəngilanda və Ermənistanın işğalı altında olan digər ərazilərdə erməni əsgərlərinin öz vətənləri kimi canlarını verməyə heç bir əsası yoxdur. Baş nazir Paşinyan heç vaxt Ermənistanın bu müharibədə qələbəsini necə gördüyünü izah etməyib. Bu müharibə “apriori” Ermənistan üçün qalibiyyətlə bitmədi və əsgərlər sadəcə öldürmək və ölmək naminə öldürüblər.
Düzünü desək, Ermənistanın siyasi rəhbərliyinin davranışı - nə siyasi, nə hərbi, nə iqtisadi, nə də ümumiyyətlə heç bir məntiqə sığmır. Adamda belə bir hiss yaranır ki, Ermənistan öz uydurduğu, qanunlara uyğun bir dünyada yaşayır. Bu davranışın yaxşı sonu yoxdur və mən eyni sualı Paşinyana verirəm - o, Ermənistanın qələbəsini necə görür? Ermənistan bu siyasəti davam etdirməklə nə ilə nəticələnəcək? Cavab yoxdur”,-deyə İ.Verdyan qeyd edib.
Aktivistin sözlərinə görə, Vladimir Putin Rusiyanın Qarabağdakı sülhməramlı missiyasının aşkar uğursuzluğu üçün bəhanələr gətirməlidir:
“Gəlin ondan başlayaq ki, bu missiya öz adına layiq deyildi, çünki RMC Qarabağda olduğu bütün müddət ərzində ermənilərlə azərbaycanlıların mövqeyini yaxınlaşdıracaq bir addım belə atılmayıb. RMK hərbi insidentlərin qarşısını almayıb“.
Qafqaz Sülh İnstitutunun rəhbəri, Gürcü politoloq Gia Nodia, fikrincə isə Ermənistan hakimiyyəti hər zaman daxili siyasətdə əsassız ambisiyaların və vədlərinin girovu olub.
“Bugünkü hakimiyyət də müəyyən praqmatizmə baxmayaraq, o birilərindən istisna deyil. Məncə, onlar əvvəldən bunun necə bitəcəyini çox gözəl anlayırdılar, lakin öz əhalisinin qarşısında qismən də olsa, simasını qorumaq üçün qəsdən təxribata getdilər. Reallıqda isə problemin indi bu yolla həll olunduğuna inanırlar”.
Putinə gəlincə isə politoloq “o, Rusiya imperiyasının mövcudluğu boyu hər bir lider kimi manevrləri elə aparır ki, bir tərəfdən sülhməramlı kimi çıxış edir, digər tərəfdən isə saatlı bombalar qoyaraq gərginliyi saxlayır:
“Bir vaxtlar Qarabağda, Abxaziyada, Cənubi Osetiyada belə idi. İndi də yanaşmaları dəyişdirərək, hər iki tərəfə təsirini saxlamağa çalışır, hər zaman öz qiymətləndirmələrində vurğunu dəyişir. Reallıqda hazırda Türkiyə ilə razılaşmadan vəziyyətin inkişafına köklü təsir göstərə bilməz”.
Ülviyyə Şahin